Pakistanda 26 milyon uşaq məktəbdən kənarda qalıb.
AzEdu.az xarici mediaya istinadən xəbər verir ki, Pakistanda federal hökumətin təhsilə ayırdığı vəsait tarixi minimum səviyyəyə enib. Bu da aztəminatlı bölgələrdə milyonlarla uşağın təhsil imkanlarını daha da məhdudlaşdırıb.
“Save the Children” təşkilatının məlumatına görə, ölkədə təxminən 26 milyon uşaq - hər üç uşaqdan biri məktəbə getmir. Bu statistika Pakistanı dünyada məktəbdənkənar uşaqların sayına görə lider ölkələrdən birinə çevirir.
2024-cü il üçün hökumət xərcləri 29% azaldılıb və təhsilə ayrılan büdcə ÜDM-in cəmi 0,8%-ni təşkil edir ki, bu da BMT-nin tövsiyə etdiyi 4-6%-dən xeyli aşağıdır.
Xüsusilə qız uşaqları daha çox təsirlənir. Məsələn, Bəlucistan əyalətində qızların 75%-i məktəbdən kənarda qalır. Savadlılıq səviyyəsi isə ümumilikdə cəmi 60% təşkil edir.
Save the Children təşkilatı hökuməti 2029-cu ilə qədər təhsil xərclərini ÜDM-in 4%-nə çatdırmaq öhdəliyinə sadiq qalmağa çağırıb.
Təşkilat həmçinin iqlim dəyişikliyinə həssas bölgələrdə davamlı təhsil sistemləri qurmaq üçün əlavə maliyyələşdirmə tələb edir. 2022-ci ildəki daşqınlar və 2024-cü ildəki isti dalğaları səbəbilə təxminən 2,9 milyon uşağın təhsili yarımçıq qalıb.
Uşaq əməyi və erkən nikah halları da artmaqdadır. Hökumətin 2021-ci il məlumatına görə, 10-14 yaşlı hər on uşaqdan biri işləyir, 18 yaşına çatmamış 19 milyon qız ərə verilir. Pakistan uşaq nikahlarının sayına görə dünyada altıncı yerdədir.
