Bir əsrdən çoxdur ki, Amerika Birləşmiş Ştatları dünyada fürsətlər ölkəsi kimi tanınır. ABŞ universitetləri yalnız təhsil mərkəzi deyil, həm də innovasiya, biznes və liderlik üçün qlobal cazibə məkanları olub. Lakin bu gün immiqrasiya siyasətində sərtləşmələr və xarici tələbələrə yönəlik qeyri-müəyyən siqnallar bu reputasiyanı təhlükə altına atır.
AzEdu.az xarici mənbələrdən aldığı məlumata əsasən xəbər verir ki, ABŞ özünün uzunmüddətli strateji üstünlüklərindən birini, beynəlxalq tələbə axınını itirmək riski ilə üz-üzədir.
Hazırda ölkə daxilində tələbə qəbulunda azalma müşahidə olunur, dünya üzrə təhsil bazarında rəqabət isə güclənməkdədir. Bu şəraitdə xarici tələbələrə məhdudiyyətlər tətbiq etmək, ekspertlərin fikrincə, həm iqtisadi, həm intellektual, həm də geosiyasi baxımdan ABŞ üçün baha başa gələ bilər.
Hesabatda vurğulanır ki, bu itkilər dərhal hiss olunmasa da, uzunmüddətli perspektivdə ABŞ-nin qlobal innovasiya gücünə ciddi zərbə vura bilər. Əgər Vaşinqton yaxın zamanda siyasətində çeviklik nümayiş etdirməzsə, bugünkü siyasi mövqelər sabahkı iqtisadi rifahı qurban verə bilər.
