Çin alimləri tərəfindən ürək fəaliyyətini radiodalğalar vasitəsilə izləyən və ürək tutması zamanı əlamətləri real vaxtda müəyyən edən yeni texnoloji diaqnostika sistemi yaradılıb.
AzEdu.az “Nature” jurnalına istinadən xəbər verir ki, yeni sistem xüsusilə geniş yayılmış ürək ritmi pozuntusu olan mürəkkəb atrial fibrilyasiyanın, yəni titrəmə tipli aritmiyanın erkən mərhələdə təmas olmadan aşkarlanmasına imkan verir.
Layihə Çin Elmi-Texnoloji Universitetinin (Hefey şəhəri) professoru Çen Yanın rəhbərliyi ilə həyata keçirilib. Tədqiqatçılar sübut ediblər ki, kompakt radarların yaydığı radiodalğaların ürək səthindən əks olunması zamanı yaranan siqnallardakı fərqlər sağlam və xəstə insanların ürək əzələsinin hərəkətlərindəki fərqləri təyin etməyə imkan verir. Bu metodikaya əsasən hazırlanan süni intellekt əsaslı sistem 6 200 nəfər könüllü (o cümlədən 229 nəfər aritmiya xəstəsi) üzərində sınaqdan keçirilib.
Süni intellekt alqoritmi təxminən 27 500 elektrokardioqram məlumatı əsasında öyrədilərək radardan gələn siqnalları analiz edib və doğru diaqnozla 90% dəqiqliklə aritmiyanı müəyyənləşdirib. Hətta bu sistem əvvəllər heç bir şikayəti olmayan və diaqnoz qoyulmamış iki yeni xəstədə də aritmiyanı vaxtında aşkarlayıb.
Qeyd edək ki, Ümumdünya Səhiyyə Təşkilatının məlumatına görə, titrəmə tipli aritmiya dünyada ən çox yayılmış ürək ritmi pozuntularından biridir və hər onillikdə yayılma sürəti 8–9% artır. Hazırda bu diaqnozla yaşayan insanların sayı 33 milyon nəfəri keçib.
