Elm və Təhsil Nazirliyinin akademik Həsən Əliyev adına Coğrafiya İnstitutunun “Qarabağ iqtisadi rayonunun qədim yurd yerləri və toponimlərinin izahlı lüğəti” çapdan çıxıb.
AzEdu.az xəbər verir ki, monoqrafiyanın müəllifi Coğrafi fikir tarixi və toponimika şöbəsinin böyük elmi işçisi, coğrafiya üzrə fəlsəfə doktoru Natiq Babayev, baş redaktoru coğrafiya elmləri doktoru professor Zakir Eminov, elmi redaktoru aparıcı elmi işçi, coğrafiya üzrə fəlsəfə doktoru Mahirə Abbasovadır.
İki hissədən ibarət kitabın birinci hissəsində Qarabağın qədim yurd yerlərinin toponimiyasına geniş yer verilib. Azərbaycanda yurd yerlərinin yaranmasının başlıca mərhələləri və əsas cəhətləri müəyyənləşdirilib, yerləşmələrin, yerdəyişmələrin mühüm problemləri araşdırılıb.
Kitabın ikinci hissəsində Qarabağ ərazisinin coğrafi adları toplanaraq tədqiq edilib, onların toponimik qanunauyğunluqları müəyyənləşdirilib, yerli coğrafi xüsusiyyətin (şəraitin) toponimiyada əks olunması faktlarının meydana gəlməsi aşkar edilib, həqiqətlər elmi dəlillərlə əsaslandırılıb.
Əsər Qarabağ ərazisindəki toponimlərin sistemli şəkildə öyrənilməsində mühüm mənbə olmaqla yanaşı, problem məsələlərin həllində də siyasi, təcrübi və elmi əhəmiyyətə malikdir.
Kitabdan elmi-tədqiqat işləri aparılarkən, eləcə də dərslik və tədris-metodik vəsaitlərin hazırlanmasında, toponimik biliklərin təbliğində, ali məktəblərdə toponimikanın tədrisində istifadə edilə bilər.
