“Uşaqlarda bilinməyən dəmir azlığı IQ-nu aşağı salır, yəni əqli inkişafa və yaddaşa mənfi təsir edir".
Bu sözləri AzEdu.az-a açıqlamasında pediatr Günay Rəsulova söyləyib.
Onun fikrincə, ət yeməyən uşaqlara əti onların sevdiyi formada və ya fərq etmədikləri şəkildə yedirmək mümkündür:
“Uşaqların rasionunda dəmirlə zəngin qidaların - ət, mal və toyuq qaraciyəri, yumurta, taxıllar, tahin və s. – olması mütləqdir. Dəmiri ən çox heyvani qidalardan alırıq. Ət yeməyən uşaqlara əti onların sevdiyi formada və ya fərq etmədikləri şəkildə yedirə bilərsiniz. Farş və ya kiçik hissələrə didilmiş əti tərəvəz pürelerinde, supda və s. yedirməyə çalışın. Əgər bu mümkün deyilsə, yumurta da yedirilə bilər. Onu da qeyd edim ki, “Qanı artsın” deyə uşağa şirin çay vermək doğru deyil".
Pediatrın sözlərinə görə, çay əksinə, dəmirin azalmasına səbəb olur. Bu səbəbdən uşaqlara çay vermək tövsiyə olunmur:
“Uşaqlara qanı artsın deyə şirin çay, şokolad, şirniyyat yedirməyin. Bu qidaların boş şəkər yükü və boş kaloridən başqa heç bir qida dəyəri yoxdur. Alma çox faydalı meyvədir, 6 ayından sonra hər gün yedirmək olar, amma almada dəmir ‘yox’ dərəcəsindədir. Qanı düşməsin deyə körpələrə vaxtından əvvəl alma suyu vermək olmaz. Ümumiyyətlə, meyvələrin suyunu yox, özünü vermək daha faydalıdır.
Pediatr həmçinin dəmir preparatlarının istifadəsi ilə bağlı mühüm məqamlara toxunub:
“Dəmir preparatları təyin olunubsa, onları süd məhsulları ilə birlikdə qəbul etməmək tövsiyə olunur. Dəmirin yaxşı mənimsənilməsi üçün az miqdarda meyvə suyu ilə içilməsi daha faydalıdır. Övladınız dəmir müalicəsi alırsa və xəstələnərsə, xəstəlik vaxtı dəmiri dayandırın və sağalandan sonra davam edin. Dişi çıxan uşaqlara dəmir preparatı verdikdən sonra ağız boşluğunu yaxalamaq vacibdir ki, dişlərdə ləkələr yaranmasın".
G.Rəsulova dəmir çatışmazlığının əlamətlərindən danışıb:
"Dəmir azlığı olan uşaqlarda yuxusuzluq, iştahsızlıq, dəri və selikli qişalarda avazıma, qeyri-adi qidalara qarşı iştah (pika), tez-tez xəstələnmə, halsızlıq, tez yorulma, yüngül fiziki hərəkət zamanı təngnəfəslik, yaddaş və zehni funksiyaların zəifliyi müşahidə oluna bilər".
