2016-cı ilin aprel döyüşləri Azərbaycan xalqının yaddaşına qəhrəmanlıq səhifəsi kimi həkk olundu. Bu dörd günlük savaş təkcə hərbi əməliyyat deyildi, o, xalqımızın milli ruhunun, ordumuzun gücünün və Ali Baş Komandan İlham Əliyevin qətiyyətli siyasətinin təcəssümü idi. Aprel döyüşləri göstərdi ki, Azərbaycan xalqı işğalla barışmayacaq və öz torpaqlarını istənilən yolla azad etməyə qadirdir.
Bu döyüşlərdə Azərbaycan Ordusu böyük şücaət göstərərək strateji yüksəklikləri və kəndləri azad etdi. Eyni zamanda, Ermənistanın illərdir toxunulmaz hesab etdiyi müdafiə xətti darmadağın edildi. Azərbaycan əsgəri düşmənin məğlubedilməz olduğu mifini qırdı və 44 günlük Vətən müharibəsinin qələbə ilə başa çatmasının əsasını qoydu.
Aprel döyüşlərinin uğurlu nəticələnməsində Prezident, Ali Baş Komandan İlham Əliyevin daxili və xarici siyasəti mühüm rol oynadı. Onun illər boyu apardığı strateji kurs sayəsində Azərbaycan güclü orduya, möhkəm iqtisadi dayaqlara və beynəlxalq arenada haqlı mövqeyini müdafiə edə bilən diplomatik nüfuza sahib oldu. İlham Əliyevin rəhbərliyi altında daxili siyasətdə ordu quruculuğu prioritet məsələyə çevrildi. Silahlı Qüvvələr ən müasir silahlarla təchiz edildi, peşəkar hərbi birliklər formalaşdırıldı və hərbçilərin sosial rifahı gücləndirildi. Xarici siyasətdə Azərbaycan həqiqətləri dünyaya çatdırıldı, Ermənistanın təcavüzkar siyasəti ifşa olundu və beynəlxalq təşkilatlarda ölkəmizin mövqeyi möhkəmləndi. Diplomatik mübarizədə Ermənistanın danışıqlarda qeyri konstruktiv mövqeyi ifşa olundu, Azərbaycanın ərazi bütövlüyünün tanınması istiqamətində ciddi addımlar atıldı. İqtisadi gücdə ölkənin müdafiə qabiliyyəti üçün kifayət qədər vəsait ayrıldı, orduya ayrılan büdcə Ermənistanın ümumi büdcəsindən qat-qat çox oldu.
Aprel döyüşləri sübut etdi ki, Azərbaycan öz torpaqlarını azad etmək əzminə sahibdir və Ali Baş Komandanın qətiyyətli siyasəti bu yolda ən böyük zəmanətdir. Bu qəhrəmanlıq dastanı yalnız bir döyüşün tarixi deyil, həm də gələcək nəsillər üçün böyük bir dərsdir. Müəllim olaraq biz bu tarixi öyrətməli, uşaqlara vətənpərvərlik ruhunu aşılamaq üçün bu hadisələri tədris prosesinə daxil etməliyik.
Vətənpərvərlik yalnız sözlə deyil, bilik və şüurla formalaşır. Aprel döyüşlərini uşaqlara öyrətmək üçün: Məktəblərdə xüsusi dərslər təşkil edilməli, bu döyüşlər barədə film və sənədli materiallar göstərilməlidir. Qəhrəman şəhidlərimizin həyat yolu öyrədilməli, onların fədakarlığı gənclərə nümunə kimi təqdim olunmalıdır. Uşaqlar bilməlidir ki, Vətən uğrunda savaşanlar təkcə əsgərlər deyil, həm də elm və bilik yolunda çalışan insanlardır.
Aprel döyüşləri Azərbaycan gənclərinə bir nümunədir: bu torpaqlar yalnız igid əsgərlər və güclü liderlər sayəsində deyil, həm də vətənpərvər ruhda yetişən yeni nəsillər sayəsində qorunacaq. Bu tarix bizə göstərdi ki, xalq və ordusu birləşəndə, güclü liderin rəhbərliyi ilə böyük qələbələr mümkündür. Azərbaycan 2016-cı ildə düşmənə zərbə endirdi, 2020-ci ildə isə bu qələbəni böyük zəfərlə tamamladı. Bu gün və gələcək nəsillər üçün bu tarixi dərsi qorumaq və öyrətmək bizim borcumuzdur.
Şəxsi inkişaf üzrə kouç,
təlimçi, marker, mentor, müəllim, “Müasir metodist” layihəsinin metodisti,
yazar, “Özünə Yox De” kitabının müəllifi
Nigar Mahi
