“Son vaxtlar rəsmi sənədlərdə belə dil ilə bağlı çox absurd səhvlərə rast gəlinir”.
Bu sözləri AzEdu.az-a açıqlamasında təhsil eksperti Rizvan Fikrətoğlu söyləyib.
Onun fikrincə, ingilis və rus dillərində səviyyəmizi ölçmək üçün imtahanlar mövcuddursa, Azərbaycan dili üçün də belə bir sistem tətbiq olunmalıdır:
“Dövlət İmtahan Mərkəzinin sədri bildirdi ki, yazıçılar Azərbaycan dilindən sertifikasiyadan keçməlidir. Məncə, bu çox yaxşı ideyadır. Biz ingilis və rus dillərində hansı səviyyədə olduğumuzu bilirik, çünki bu dillərdən imtahanlar var. Bəs niyə Azərbaycan dili üçün də belə bir sistem tətbiq olunmasın? Bu addım həm yerli vətəndaşların, həm də xaricilərin Azərbaycan dili biliklərini qiymətləndirmək baxımından vacibdir".
Ekspert hesab edir ki, yazıçılar ilə yanaşı müxtəlif sahələrdə çalışan şəxslər də Azərbaycan dili səviyyə imtahanında iştirak etməlidir:
“İlk mərhələdə məcburi olmasa da, gələcəkdə bu imtahanlar vacib olmalıdır ki, şəxslərin dil bacarıqları obyektiv şəkildə qiymətləndirilsin. Son vaxtlar hətta rəsmi sənədlərdə belə ciddi dil səhvlərinə rast gəlinir. Dövlət qurumlarında çalışan şəxslərin Azərbaycan dili bilikləri yetərli deyilsə, onlar bu istiqamətdə təlimlərə cəlb olunmalı və imtahandan keçməlidirlər".
Ekspert həmçinin qeyd edir ki, nəzərdə tutulan imtahanın kimlər tərəfindən aparılacağı barədə ictimaiyyətə məlumat verilməlidir.
