AzEdu.az Təhsil Portalı “Tarixdə bu gün” rubrikasına davam edir.
2 aprel harada nәlәr baş verib, kimlәr xatırlanır? Qısaca nәzәr salaq.
2 aprel Ümumdünya Autizm Maarifləndirmə Günüdür:
Bütün dünyada aprel ayı autizm haqqında maarifləndirməyə həsr olunur. Hər il Azərbaycanda da cəmiyyətin autizm mövzusunda maarifləndirilməsi ilə bağlı silsilə tədbirlər keçirilir. “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın icrası üzrə keçirilən tədbirlərin məqsədi ictimaiyyətin və hökumətin diqqətini autik spektr pozğunluqları ilə üzləşmiş insanların və ailələrin ehtiyaclarına yönəltməkdir.
2 aprel 1993-cü ildə Kəlbəcər rayonu Ermənistanın təcavüzkar qüvvələri tərəfindən işğal olunub:
Kəlbəcərin işğalı nəticəsində 511 nəfər həlak olub, 321 nəfər itkin düşüb və girov götürülüb. İşğal nəticəsində rayonun 61 min sakini didərgin düşüb, onlarla tarixi-mədəniyyət abidəsi, muzey, "İstisu" sanatoriyası Ermənistan silahlı qüvvələri tərəfindən xarabazara çevrilib.
Kəlbəcərin işğalından sonra 3205 saylı iclasda BMT Təhlükəsizlik Şurası 822 saylı Qətnamə qəbul edib, qətnamədə bütün işğalçı qüvvələrin Kəlbəcər və Azərbaycanın digər işğal olunmuş rayonlarından dərhal çıxarılması tələb olunurdu. Lakin ötən 27 ildə həmin qətnamədən irəli gələn hər hansı öhdəlik yerinə yetirilmədi. Nəhayət, 2020-ci ildə 44 günlük müharibənin yekunu olaraq Ermənistan məğlub oldu və Kəlbəcər döyüşsüz azad edildi.
2 aprel 2014-ci ildə Prezidentin Sərəncamı ilə “Azərbaycan Respublikasında informasiya cəmiyyətinin inkişafına dair 2014-2020-ci illər üçün Milli Strategiya” təsdiq edilib.
2 aprel 1854-cü ildə dramaturq Nəcəf bəy Vəzirov anadan olub:
O, “Müsibəti-Fəxrəddin” əsəri ilə Azərbaycan ədəbiyyatında faciə janrının əsasını qoyub. “Daldan atılan daş topuğa dəyər", "Sonrakı peşmançılıq fayda verməz", "Adı var, özü yox", "Yağışdan çıxdıq, yağmura düşdük" və başqa əsərləri ilə Azərbaycan dramaturgiyasına yeni nəfəs gətirib.
