AzEdu.az Təhsil Portalı “Tarixdə bu gün” rubrikasına davam edir.
17 fevral harada nәlәr baş verib, kimlәr xatırlanır? Qısaca nәzәr salaq.
17 Fevral Təmənnasız Xeyirxahlıq İfadəsi Günüdür:
Hər il fevralın 17-də bütün dünyada qeyd olunan Təmənnasız Xeyirxahlıq İfadəsi Günü (Random Acts of Kindness Day) beynəlxalq xeyriyyə təşkilatlarının təşəbbüsü ilə təsis olunmuşdur. Bu bayram ABŞ-da yaransa da, lakin bu gün artıq ümumdünya əhəmiyyətli bayrama çevrilmişdir və vətəndaşlıqdan, milliyyətdən və dini inanclardan asılı olmayaraq qeyd olunur.
Bu bayram daha çox Qərbi Avropa və ABŞ-da məşhurdur. Həmin gün bir çox şəhərdə ənənəvi olaraq məşhur aktyorların, ictimai və siyasi xadimlərin iştirakı ilə xeyriyyə tədbirləri və marafonları keçirilir.
17 fevral 1992-ci ildə Qaradağ qətliamı törədilib:
Saat 05:30-da erməni-rus hərbi birləşmələrinin hücumu nəticəsində bir neçə saat ərzində Xocavənd rayonunun 1000 nəfər əhalisi olan və ermənilərin yaşadıqları qonşu Ağkənd, Aşan, Paravatumb, Qağarza, Qarakənd, Gavahın, Dağdağan, Kəndxurd, Kiş, Mirikənd, Mısmına, Müşkabad, Ningi, Harov kəndləri ilə əhatələnən azərbaycanlıların məskunlaşdığı cənnətməkan Qaradağlı kəndi işğal edilir.
Bu işğalda 23-cü diviziyanın 366-cı alayının da müstəsna xidmətləri olub. Beləliklə bu gün tarixə “Qaradağlı faciəsi” kimi düşür.
17 fevral 1988-ci ildə Qərbi Azərbaycan ərazilərindəki azərbaycalılar deportasiya edilib:
Qafan rayonundan deportasiya edilən 4 000 nəfər soydaşımız Azərbaycana pənah gətirir. Ermənistan SSR rəhbərliyinin azərbaycanlılara qarşı etnik təmizləmə siyasəti artıq tam gücü ilə işə düşür.
17 fevral 1990-cı ildə Naxçıvanın Günnüt kəndi (Şərur rayonu) ermənilər tərəfindən dağıdılıb, işğal olunub.
