“Düşünürəm ki, uçuş mühəndisliyi ixtisasına, eyni zamanda bu istiqamətdə olan hava nəqliyyatının hərəkətinin təşkili, aerokosmik mühəndislik, aviasiya təhlükəsizliyi mühəndisliyi kimi ixtisaslara olan maraq daha da artacaq”.
Bu sözləri AzEdu.az-a açıqlamasında təhsil eksperti Rizvan Fikrətoğlu qeyd edib.
Ekspertin sözlərinə görə, Azərbaycandakı Milli Aviasiya Akademiyasında uçuş mühəndisliyi ixtisası olduqca yüksək səviyyədə tədris olunur:
“Nəinki MDB ölkələri, ümumiyyətlə Avorpa ölkələri səviyyəsində bizdə pilotlar yetişdirilir. Bunun üçün şərait, potensial, müəllim-professor heyəti və digər məsələlər günü-gündən yaxşılığa doğrudur. Həmçinin, bizim aviasiya sistemimiz ən müasir texnologiyalarla təchiz edilib. Bu sahənin inkişafı baxımdan hər il dövlət büdcəsindən vəsait ayrılır.
Təbii ki, qəzalar qaçınılmazdır. Əgər illik statistika tərtib etsək avtomobil qəzaları nəticəsində vəfat edənlərin sayının nə qədər çox olduğunu görə bilərik. Yəni demək olar ki, avtomobil qəzalarının hər gün şahidi oluruq. Lakin təyyarə qəzaları tez-tez baş vermir. Məlumdur ki, dekabrın 25-də AZAL-a məxsus Bakı-Qroznı reysilə uçan “Embraer 190” təyyarəsimizi Qroznı səmasında Rusiyanın "Pantsir-S1” zenit-raket kompleksi vurub. Yəni təcrübəsizlikdən, pilot səhvindən və ya hansısa təbii hadisələr nəticəsində aviaqəza baş verməyib. Sahə üzrə beynəlxalq ekspertlər də, hətta Rusiyanın ekspertləri də bu qənaətdədirlər ki, pilotlarımız olduqca peşəkarlıq nümayiş etdiriblər. Əslində, həmin qəzada insanların sağ qalması mümkün deyildi. Lakin bizim pilotlar son ana qədər bütün imkanlardan istifadə edib və bunun nəticəsində 29 nəfər sağ qala bilib”.
R.Fikrətoğlu bildirib ki, insanlar bu peşəni müqəddəs sayacaqlar:
“Düşünürəm ki, uçuş mühəndisliyi ixtisasına, eyni zamanda bu istiqamətdə olan hava nəqliyyatının hərəkətinin təşkili, aerokosmik mühəndislik, aviasiya təhlükəsizliyi mühəndisliyi kimi ixtisaslara olan maraq daha da artacaq. Maraqlı bir faktı da qeyd edim ki, bu aviaqəzadan sonra, son 2-3 gün ərzində 4 nəfər mənə AZAL-da bələdçi işləmək üçün oraya qəbul prosesini maraqlanıblar. Onlardan 3-ü xanım, 1-i isə oğlandır. Mənə hələ bu günə qədər heç vaxt belə müraciət olunmamışdır.
Görün insanların qəlbində necə bir sevgi hiss yaranıb ki, onlar artıq bu sahəni davam etdirmək fikrinə düşürlər. Burada karyera məsələsi ikincidir. İnsanların qəlbini fəth etmək, ürəklərdə əbədiyyətə qovuşmaq, onların qəhrəmanına çevrilmək hər adamın işi deyil.
Hesab edirəm ki, aviasiya sahəsinə maraq artacaq. Biz bunu növbəti illərin tələbə qəbulunda görə biləcəyik. Hətta insanlar bu peşəni qəlbində müqəddəs sayacaqlar”.
Ekspert sonda Milli Aviasiya Akademiyasına qəbul qaydalarından danışdı:
"Milli Aviasiya Akademiyasına tələbə qəbulu Dövlət İmtahan Mərkəzinin (DİM) və «Azərbaycan Hava Yolları» Qapalı Səhmdar Cəmiyyətinin təsdiq etdiyi qəbul qaydaları əsasında aparılır.
Qəbul qaydalarında göstərilən tələbləri yerinə yetirən abituriyentlər, DİM tərəfindən keçirilən test imtahanlarının və ümumi müsabiqənin nəticələrinə əsasən Milli Aviasiya Akademiyasına qəbul olunurlar.
Milli Aviasiya Akademiyasının ixtisaslarının Təhsil Proqramları ölkəmizin və dünyanın əmək bazarının mütəxəssislərə olan ən müasir tələbləri əsasında aparıcı elm və təhsil mərkəzlərinin, sənaye müəssisələrinin və şirkətlərin təcrübəsindən istifadə edilməklə hazırlanaraq, Azərbaycan Respublikası Elm və Təhsil Nazirliyi tərəfindən təsdiq edilib".
