Hər kəs övladına maraqlı, yaddaqalan, mənalı ad qoymaq istəyər. Elə ad ki, o uşaq yaşadığı müddətdə utanmasın, adıyla qürur duysun, adını yaşatsın, adıyla yaşasın. Ancaq təəssüf ki, bəzi hallarda bu heç də belə olmur. Valideynlər “Kreativ”lik adı altında mənası olmayan, qeyri-adi adları uşaqlarına qoymaq istəyirlər. Bu zaman isə “ASAN Xidmət”-də problemlərlə qarşılaşırlar.
Bəs görəsən, uşaqlara adın qoyulması hansı qanunla tənzimlənir?
AzEdu.az məsələ ilə bağlı araşdırma edib.
Araşdırmaya əsasən, Mülki Məcəllənin 26-cı maddəsini ilə fiziki şəxslər, Ailə Məcəlləsinin 53-cü maddəsi ilə isə uşaqlar ad, ata adı və soyad danışmaq hüququna malikdir:
“Ancaq bununla yanaşı ad hüququ məhdudlaşdırıla bilən hüquqdur. Nazirlər Kabinetinin “Adın, ata adının və soyadın verilməsi və dəyişdirilməsi Qaydaları”nın 1.4-cü bəndinə əsasən uşağın mənafeyinə xələl gətirə biləcək, habelə şəxsin cinsinə uyğun gəlməyən və ya gülünc adın verilməsinə yol verilmir.
Ali məhkəmənin İnzibati Kollegiyasının 27 aprel 2021-ci il tarixli qərarına əsasən ad almaq hüququ Azərbaycan dövlət dilinin işlənməsinə və qorunmasına uyğun olaraq məhdudlaşdırıla bilər. Buna görə də uşağa ad seçərkən Azərbaycan dilinin norma tələblərinə əməl etmək lazımdır”.
