Xəbər verdiyimiz kimi dekabrın 25-də “Azərbaycan Hava Yolları” aviaşirkətinin Bakı-Qroznı reysini yerinə yetirən sərnişin təyyarəsinin Qazaxıstanın Aktau şəhəri yaxınlığında qəzaya uğraması nəticəsində həlak olanlar arasında ekipajın komandiri, təcrübəli pilot İqor Kşnyakin də yer alıb.
AzEdu.az-ın əldə etdiyi məlumata əsasən, təcrübəli pilot İqor Kşnyakin ilk təhsilini Sovet İttifaqı Qəhrəmanı Taran adına Sasovo Mülki Aviasiya uçuş məktəbinində 1982-ci ildə pilot ixtisası üzrə almışdır. İqor Kşnyakin 1982-ci ildə Yevlax Birləşmiş Aviasiya Dəstəsinin An-2 təyyarəsinin 2-ci pilotu vəzifəsində əmək fəaliyyətinə başlayıb. O,1984-cü il yanvarın 6-dan Zabrat Birləşmiş Aviasiya Dəstəsinin An-2 təyyarəsinin 2-ci pilotu, 1990-cı ildə Azərbaycan Mülki Aviasiya İdarəsinin Yak-40 Hava Gəmisinin 2-ci pilotu vəzifələrində çalışıb. Həmçinin, 1992-ci ildə Rusiya Dövlət Hidrometroloji İnstitutunun Meteorologiya ixtisasını bitirmişdir.
1994-cü ildə Yak-40 Hava Gəmisinin komandiri, 1997-ci ildə “Azal” Milli Aviasiya Şirkətinin Yak-40 Hava Gəmisinin kapitanı vəzifəsinə təyin edilib. 1998-ci ildə Tu-134 Hava Gəmisinin 2-ci pilotu vəzifəsinə təyin olunur. 2005-ci ildə An-140 Hava Gəmisinin kapitanı, 2008-ci ildən etibarən ATR-42/72 Hava Gəmisinin kapitanı vəzifəsinə yüksəldilir.
İqor Kşnyakin 2013-cü iyunun 3-dən etibarən, Embraer-170/190 Hava Gəmisi üzrə yenidən təlim kursunu müvəffəqiyyətlə bitirdikdən sonra həmin Hava Gəmisinin stajçı-pilotu vəzifəsinə keçirilib. 2013-cü dekabrın 11-dən etibarən “Azərbaycan Hava Yolları” QSC-nin Uçuşların İstehsalı İdarəsinin Uçuş Xidmətində Embraer-170/190 Hava Gəmisinin kapitanı vəzifəsinə təyin edilib.
Qeyd edək ki, İqor Kşnyakinin Anastasiya və Darya adında iki qız övladı var.
Tələbə yoldaşı olan Bayram Muxtarov ATV telekanalına müsahibəsində pilot İqor Kşnyakinin təyyarə məktəbini birgə qurtardığını söyləyib.Bayram Muxtarovun sözlərinə görə, Aleksandr Kalyaninov onların yetirməsi olub.
