Bu gün magistratura təhsili alan şəxslərə iş yerlərində daha çox tələbat olduğu məlumdur. İşəgötürənlər, xaricdə magistratura təhsili almış şəxslərlə ölkəmizdə bu təhsili almış şəxslər arasında fərq qoyurlar.
Maraqlıdır, ölkəmizdə magistratura təhsili yetərincə yüksək səviyyədə tədris olunmurmu?
AzEdu.az-a açıqlama verən təhsil eksperti Qoşqar Məhərrəmov qeyd edib ki, bəzi universitetlərdə tələbə dərsə getdiyi zaman nə müəllim, nə də tələbə görür. Belə hallar təhsilin səviyyəsini aşağı salır:
“İş yerlərində xarici təhsilə üstünlük verilməsinin müxtəlif səbəbləri var. İlk növbədə, işəgötürənlər müxtəlif baxış bucaqlarına ehtiyac duyurlar. Onlar mövcud kadrlardan fərqli bilik və bacarıqlara malik işçiləri işə götürmək istəyirlər ki, bu işçilər əlavə dəyər yaratsın. Bu məqsədlə də magistratura təhsilini xaricdə almış şəxslərin belə xüsusiyyətlərə malik olacağını düşünürlər.
Bu yanaşma müəyyən qədər haqlıdır. Axı ölkədəki universitetlərin və ümumi təhsil mühitinin vəziyyəti məlumdur. İşəgötürən yerli universitet məzunlarını tanıyır və onların potensialını müəyyən dərəcədə qiymətləndirə bilir. Lakin magistratura təhsilini xaricdə almış bir işçi barədə bu qədər dəqiq məlumata sahib olmur. Bu həm risk, həm də fürsət yaradır”.
Ekspert bildirib ki, xaricdə təhsil almaq, keyfiyyətli kadr olmağın əsas şərti deyil, amma, bu, yaxşı kadr olmağa təsir edən əhəmiyyətli amillərdən biridir. Eyni zamanda, yerli universitet məzunu olmaq, səriştəsiz kadr olmaq anlamına gəlmir:
“Ancaq statistik baxımdan ölkəmizin magistratura təhsilində problemlər mövcuddur. Bir çox universitetdə dərslər müntəzəm və keyfiyyətli şəkildə keçirilmir. Hətta bəzi universitetlərdə tələbə dərsə getdiyi zaman nə müəllim, nə də tələbə görür. Belə hallar təhsilin səviyyəsini aşağı salır. Dərslər yalnız ad olaraq keçirilir, tələbələr isə ara-sıra dərsə gedir, sonda elmi iş yazıb məzun olurlar. Bu sistemi dəyişməyə çalışan bir neçə universitet olsa da, ümumi mənzərə hələ də qaneedici deyil.
Səbəb isə universitetlərin bu məsələyə ciddi yanaşmamasıdır. Tələbələr universiteti sadəcə diplom verən bir yer kimi görürlər. Halbuki, universitetlər prinsipiallıq göstərib, tələbələrə ciddi dərslər keçməli, onları nəticəyə görə qiymətləndirməli və inkişafları üçün tövsiyələr verməlidir. Tələbə dərs oxumasa, kəsiləcəyini görsə, bu, onu daha çox çalışmağa məcbur edərdi”.
Q.Məhərrəmov əlavə olaraq qeyd edib ki, belə hallar xarici universitetlərdə nadir rast gəlinən problemlərdir:
“Dünyanın ilk 500 universitetində ciddi dərslər, elmi tədqiqatlar, akademik yazı bacarıqları öyrədilir. Belə yanaşma nəticəsində tələbələrin bilik və bacarıqları daha yüksək səviyyədə olur.
“Ümumiyyətlə, tələbə dünyanın ilk 500 və ya ilk 100-lük universitetlərindən məzun olarsa, bu, onun həm daha prestijli, həm də səriştəli kadr olmasının göstəricisidir. Belə məzunların bilik və bacarıqları adətən yerli universitet məzunlarından daha yüksək səviyyədədir”.
