Müşahidələr göstərir ki, bu gün bir çox Bakı məktəblərində, bir sinifdə 35-40 şagird təhsil alır. Hətta bəzi məktəblərdə bu say 45-dir. Nəticədə isə cəmiyyət tərəfindən belə bir düşüncə formalaşır: "müəllim 35-40 uşağa, 45 dəqiqə içərisində necə keyfiyyətli dərs deyə bilər?"
Bir çoxları fikirləşir ki, sinifdə təhsilalanların sayı azaldılmalıdır ki, keyfiyyətli dərs şəraiti yaradılsın.
Maraqlısı odur ki, həqiqətən də sinifdə şagird çoxluğu müəllimin tədris etdiyi fənnin keyfiyyətini aşağı salırmı?
Mövzu ilə bağlı AzEdu.az-a açıqlama verən, təhsil eksperti Elnur Hacıyev qeyd edib ki, müəllimləri də anlamaq lazımdır, 35-40 şagirdlə 45 dəqiqə ərzində effektiv dərs keçmək o qədər də asan iş deyil:
"35-40 şagirdin olduğu siniflərdə fəal və interaktiv dərslərin təşkili çətinləşir, bəzən isə mümkünsüz olur. Bu, təlim nəticələrinə çatmağı da çətinləşdirir və tədrisin keyfiyyətini aşağı salır.
Şagird sıxlığına görə, övladına ümumtəhsil məktəblərində fərdi yanaşma və diqqət görməyən valideynlər, maddi imkanları olduqda, övladlarını özəl məktəblərə və ya fərdi hazırlıqlara yönləndirməyə məcbur olurlar.
Bu məsələdə müəllimlərin də anlamaq lazımdır. 35-40 şagirdlə 45 dəqiqə ərzində effektiv dərs keçmək asan deyil. Ümumtəhsil məktəblərində, xüsusilə şagird sıxlığının müşahidə olunduğu məktəblərdə, müəllim-şagird nisbətinin optimallaşdırılmasına ehtiyac var.
Müəllimlərimizin çevik, sürətli və effektiv təlim nəticələrinə çatması üçün metodoloji və rəqəmsal bacarıqlarının müntəzəm olaraq təkmilləşdirilməsi zəruridir”.
Həmsöhbətimiz vurğulayıb ki, şagird sayı çox olan siniflərdə dərs deyən müəllimlərə motivasiya yarada biləcək dəstək verilməsi problemin həllinə kömək edə bilər:
"Əlavə maddi dəstək alan və ya qeyri-maddi yollarla həvəsləndirilən müəllimlərimiz, bu istiqamətdə bacarıqlarını daha da inkişaf etdirərək, şagird sayı çox olan siniflərdə effektiv təlim mühitini təmin etməyə çalışar. Bu da öz növbəsində tədrisin keyfiyyətini artırar və təhsil nəticələrini yüksəldər".
