Hər il tələbə qəbulu zamanı özəl universitetlərə seçim edənlərin dayında azlıq müşahidə olunur. Bir çox tələbə ancaq az bal topladıqları təqdirdə özəl universitetlərə seçim etməli olduqlarını düşünür.
Xarici ölkələrdə bunun tam əksi baş verir: yüksək bal toplayanlar daha çox özəl universitetləri seçirlər. Maraqlı məqamlardan biri odur ki, Azərbaycanda valideynlər övladlarını özəl bağçaya, liseyə və məktəbə göndərdiyi halda, özəl universiteti seçmək istəmirlər.
Mövzu ilə bağlı AzEdu.az-a açıqlama verən elm və təhsil eksperti Rizvan Fikrətoğlu qeyd edib ki, hazırda özəl ali təhsil müəssisələrinə qəbul olunanların əksəriyyəti balı dövlət ali təhsil müəssisələrinə çatmayanlardır:
“Təhsil sisteminə, idarəetmə xüsusiyyətlərinə və ümumi münasibətlər baxımından ölkəmizdə özəl universitetlər hələ kifayət qədər nüfuz qazana bilməyib. Dövlət İmtahan Mərkəzinin statistikasına əsaslansaq görərik ki, adətən, özəl ali təhsil müəssisələrinin ixtisas kodlarını ərizələrində 1-ci göstərən abituriyentlərin və subbakalavrların faiz nisbəti 10-u keçmir. Ərizələrdə özəl universiteti 1-ci yerdə yazmaq, hələ ali məktəbə qəbul olunmaq demək deyil. Bu abituriyentlərin çoxu da az bal toplayandır. Özəl universitet seçimində irəliləyiş çox azdır. Son illərdə özəl ali məktəblərə ödənişlər dövlət universitetlərinə bərabər, bir sıra hallarda isə azdır. Görünür, bu güzəşt də abituriyentləri özəl təhsilə cəlb edə bilmir”.
Müsahibimiz qeyd edib ki, cəmiyyətin böyük qismi özəl təhsil ocaqlarına, sanki gələcəyi bəlli olmayan universitet kimi baxır:
“Lakin ölkəmizin təhsil qanunvericiliyi imkan verir ki, özəl ali təhsil müəssisəsi bağlandığı halda, meyarlar nəzərə alınmaqla tələbələr digər özəl və dövlət universitetlərinə köçürülsünlər. Çünki bütün universitetlərə qəbul vahid formada – DİM-in keçirdiyi imtahanlar əsasında aparılır.
Qənaətim budur ki, özəl universitetlər tədrisin keyfiyyətini və idarəçiliyi yüksəltməli, bilikli tələbələrə təhsil haqqının məbləğində güzəştlər etməlidirlər. Bundan əlavə, özəl təhsilə investorlar cəlb olunmalı, onlar müxtəlif təqaüd proqramlarından yararlanmalıdırlar. Özəl universitetin ciddi maliyyə mənbəyi olmalıdır ki, yüksək ixtisaslı kadrlar cəlb edilsin, zəngin texnologiya imkanları olsun ki, ciddi elmi tədqiqatlar aparılsın”.
