Bu gün gənclər arasında sosial şəbəkələrə və blogerliyə maraq geniş vüsət alıb. Hətta universitetlərdə tələbələr öz kanalları üçün müxtəlif üslubda videolar çəkirlər. Bu hal gənclərin təhsilinə maneə olub-olmaması sualını ortaya çıxarır.
Mövzu ilə bağlı sosialoq Lalə Mehralı AzEdu.az-a açıqlamasında bildirib ki, bu gün əlində telefon olmadan yeriyə bilən gəncləri görmək çətinləşib.
"Gənclərin blogerliyə marağı onların təhsilinə və gündəlik həyat keyfiyyətinə təsir etmirsə, bu artıq bir məşğuliyyət və ya iş imkanı halına gəlibsə, bu, müsbət bir haldır. Amma onu da qeyd edim ki, sosial şəbəkələrə asılılıq həyat keyfiyyətini minimuma endirir, iş və ailəyə ayıra biləcəyimiz vaxtı oğurlayır”.
Həmsöhbətimiz, gənclərin dərsə olan marağının smartfonlarla əvəz olunduğunu bildirib:
"Artıq həyat smartfonda və sosial şəbəkələrdədir. Bu cür asılılıq, keyfiyyətli həyat şəraitini təmin etməyə mane olur. Bu gün xəstəlik həddində asılılıq var, bu da yolverilməzdir. Bəzən insanlar bu cür yaşamın normal olduğunu düşünür, lakin davam edərsə, iş və dərs keyfiyyəti minimuma düşəcək.
Ümumilikdə, insanlar, xüsusilə də gənc nəsil, həyatını sosial şəbəkələrdə paylaşmaq üçün yaşayır. Heç kəs öz həyatını özü və ailəsi üçün yaşamır. Davamlı olaraq geyimlərini, yeyib-içdiklərini, getdikləri yerləri paylaşmasalar, sanki özlərini bunlara sahib olmamış kimi hiss edirlər, bu vəziyyətdən həzz almırlar. Bu, çox çirkin bir haldır".
