Əvvəllər uşaqlar, xüsusilə qız uşaqları, atasından çəkinməli və onun yanında daha az danışmalı, gülməməli olduqlarını düşünürdülər. Bu, hörmət əlaməti kimi qəbul edilirdi.
Hazırda bu düşüncə ilə yaşayan bəzi ailələr hələ də mövcuddur, lakin bu yanaşma uşaqlarda ataya qarşı qorxu hissini artıraraq onlar arasında yadlaşmaya səbəb olur. Cəmiyyətin qaydaları uşaq və ata arasındakı münasibəti korlayır, bu isə uşaqların gələcəkdə ailə münasibətlərinə mənfi təsir göstərir.
Mövzu ilə bağlı AzEdu.az-a açıqlama verən psixoloq Nizami Orucov uşaqların dünyasının ailə içində formalaşdığını vurğulayır.
O, qeyd edir ki, bu cür münasibətlərin yalnız ata-övlad əlaqəsinə deyil, uşağın gələcək münasibətlərinə də ciddi təsiri var:
“Qorxuya əsaslanan dəyərlər sistemi, uşağın dostluq münasibətlərindən tutmuş, özü ilə olan münasibətinə qədər səhvlərə yol açır. Atadan qorxmaq və münasibətlərin, sevginin qorxu üzərindən qurulması, səmimi və qalıcı olmur. Emosional tələbatları ödənilməyən övlad, xüsusilə də qız övladı, gələcəkdə ciddi zədələr və yaralar yaşayır.
Bu gün qəbul üçün gələn insanların bir çoxu, məhz bu yanlış münasibətlər səbəbindən yaşadıqları çətinliklərdən şikayətlənirlər. Emosional aclıq, bəzən bir ömür boyu sağalmağı gözləyir. Bu vəziyyətin düzəldilməsi və ödəməsi isə çətin olur”.
