Bu gün dünyanın qabaqcıl universitetlərində tədris Bolonya sistemi ilə həyata keçirilir. Müşahidələr göstərir ki, artıq Azərbaycan universitetlərinin bir qismində də Bolonya tədris metoduna keçid edilir.
Ümumiyyətlə, sözügedən sistemin təhsilimiz, həmçinin tələbələrin inkişafı üçün əhəmiyyəti nə yerdədir?
Mövzu ilə bağlı AzEdu.az-a danışan təhsil mütəxəssisi Adil Vəliyev qeyd edib ki, Azərbaycan universitetlərində Bolonya sistemini tam şəkildə tətbiq etmirik:
"Azərbaycanda illərdir ki, Bolonya sistemi tətbiq olunur. Bu sistemə uyğun müəyyən tədris planları hazırlanır, ancaq tam tətbiq edilmir. Bunun səbəbi, Bolonya sisteminin bəzi qaydalarının bizdəki şərtlərə uyğun olmamasıdır. Əgər biz bu qaydaları tam şəkildə tətbiq etsək, tələbələrin göstəricilərinə mənfi təsir edə bilər. Tələbələr bunun fərqinə varmasa da, məzun olduqdan sonra bilik və bacarıqları ilə bağlı geri düşdüklərinin fərqində olacaqlar".
A.Vəliyev əlavə edib ki, indiki dövrdə Azərbaycanda tətbiq olunan Bolonya sisteminin bəzi qaydaları, sistemin yalnız lazım olan hissələrini inkişaf etdirməyə imkan tanıyır:
“Ümumiyyətlə, Bolonya sistemi tələbələrin rahatlığı və dərslərin daha keyfiyyətli mənimsənilməsi baxımından müsbət təsir göstərir. Bu sistem dünyanın qabaqcıl universitetlərində tətbiq olunur və nəticələri ürəkaçandır”.
