Bu gün bir çox universitetlərdə kollokviumlar keçirilir. Bəzi tələbələr bunu gərəksiz hesab edir və əlavə stres yaratdığını düşünür. Digər tələbələr isə kollokviumun dərsə qarşı məsuliyyəti artırdığını bildirirlər.
Ümumiyyətlə, kollokviumun tələbələrə nə kimi yararı var?
Təhsil üzrə mütəxəssis Elçin Süleymanlı AzEdu.az-a açıqlamasında bildirib ki, bir semestr boyunca aparılan tədris qiymətinin yalnız semestr imtahanları ilə qiymətləndirilməsi düzgün deyil.
“Universitetlərdə kollokviumlar, semestr daxili imtahanlara aiddir. Bir çox inkişaf etmiş universitetlərdə bu proses mövcuddur. Çünki, bir semestr boyunca keçirilən dərslərin qiymətləndirilməsi yalnız sessiya imtahanları ilə düzgün olmaz. Bəzi universitetlərdə buna ara imtahanı, bəzilərində isə tələbənin semestr imtahanı ərzindəki fəallığı ilə qiymətləndirirlər. Düşünürəm ki, kollokvium vacibdir və olmalıdır. Onun forması isə pedaqoji heyətin qabiliyyətindən və dərsin mahiyyətindən asılıdır. Məsələn, bəzi dərslərdə kollokvium sual-cavab, bəzilərində isə test üsulu ilə keçirilir. Kollokviumun necə aparılacağı isə ilin əvvəlindən silabuslarda göstərilməlidir, buna kafedra qərar verməlidir”.
Ekspert, tələbə sayı çox olan və ümumi fənlər blokuna aid dərslərdə kollokviumların test şəklində keçirilməsini tövsiyə edir:
“Tələbə sayı az olan, xüsusilə magistrantlar üçün bu proses yazılı və məntiqi istiqamətdə aparılmalıdır. Bu, tələbələrin semestr sonu imtahanına hazırlaşması üçün vacibdir. Tələbənin yekun qiymətinə kollokviumdan başqa dəvamsızlıq və semestr ərzindəki fəaliyyət də təsir göstərir”.
