Hər bir müəllimin fərqli dərs metodu var. Bəziləri uşaqlara dərsi daha əyləncəli şəkildə başa salır, bəziləri dərs vaxtı daha ciddi olur, digər təhsilverənlər isə hər dərs üçün alternativ yollar düşünürlər.
Maraqlıdır, dərsin keyfiyyətini artırmaq üçün necə bir dərs metodundan istifadə etmək doğru olardı?
Mövzu ilə bağlı AzEdu.az-a açıqlama verən təhsil mütəxəssisi İlqar Orucov qeyd edib ki, dərsin interaktivliyini təmin etmək müəllimdən pedaqoji ustalıq tələb edir:
“Hər bir müəllimin tədris etdiyi dərsdə fərqli metodlardan istifadə etməsi mümkündür. Burada əsas məqsəd müəllimin şagirdə dərsi yaxşı səviyyədə çatdıra bilməsidir. Eyni zamanda, müəllim tədris etdiyi fənn haqqında o qədər məlumat verməlidir ki, şagird o mövzu ilə bağlı düşünə bilsin.Müəllim sinifdəki ən passiv uşaqda belə mövzuya qarşı maraq oyatsa, dərs daha keyfiyyətli olacaq. Hər hansı bir dərs metodundan istifadə etməsindən asılı olmayaraq, müəllimin məqsədi dərs prosesində demokratik mühiti təmin etməkdir. Şagirdlər özünü dərsin və sinifin bir parçası kimi hiss etməli və dərsə aktiv şəkildə qoşulmalıdırlar. Müəllim həm də ciddi olmalı, bəzi hallarda ciddiliyi yumor hissi ilə birləşdirərək keçid etməlidir. Bu artıq müəllimdən pedaqoji taktika tələb edir”.
Müsahibimiz vurğulayıb ki, müəllim mühazirə tipli dərs keçirsə, şagirdlərin bir qismi yatacaq, bu isə itirilmiş dərsə çevriləcək:
“Ancaq müəllim ən passiv uşağı, ən aktiv şagird ilə eyni səviyyədə tutarsa və dərsi əyləncəli şəkildə təqdim edərsə, dərsin keyfiyyəti artar. Müəllim, fənlərarası keçid yanaşması təmin etməklə aktiv və passiv şagird anlayışını aradan qaldıra bilər. Hər bir uşağın içində istedad var. Müəllimin isə həmin istedadı müəyyən edə bilməsi və dərsi onun üçün maraqlı olan formada təqdim etməsi uğurlu müəllim obrazını yaradır.
Bəzən müəllim çox savadlı olur, ancaq biliklərini çatdıra bilmir, çünki onun pedaqoji ustalığı yoxdur. Müəllimlərin həm də dünyada tətbiq olunan yeni metodları mənimsəməsi vacibdir. Mütləq standart yanaşmalardan kənara çıxmalıdırlar”.
