Müşahidələr onu göstərir ki, əsgərlik yaşına çatmış, ali məktəblərə qiyabi təhsil üzrə qəbul olan şəxslər həqiqi hərbi xidmətə çağırılır. Onlar təhsillərini geridə qoyaraq hərbi xidmətə yollanmaq məcburiyyətində olurlar. Belə olduqda isə ali təhsilləri yarımçıq qalır.
Bəs, sizcə bu sistem nə dərəcədə doğrudur?
Mövzu ilə bağlı AzEdu.az-a açıqlama verən təhsil eksperti Elnur Hacıyev, qeyd edib ki, cari vəziyyətdə təhsilin yarımçıq dayandırılması tələbənin şəxsi inkişafını, o cümlədən karyera imkanlarını məhdudlaşdıra bilər.
“Burada balansı tapmaq lazımdır.Həm hərbi xidmət, həm də ali məktəbdə təhsil vacib və əhəmiyyətli məsələdir. Bir tərəfdən, hərbi xidmət ölkənin təhlükəsizliyi və vətəndaşların vəzifə borcu kimi vacibdir. Digər tərəfdən, təhsil də şəxsin gələcək inkişafı və cəmiyyətin intellektual potensialının artırılması üçün önəmli faktordur.
Ali təhsil almaq vətəndaşımızın həm özü üçün, həm də ölkəmiz üçün uzunmüddətli faydalar təmin edə bilər. Qanunvericilik tələbələrə təhsil aldıqları dövrdə hərbi xidməti təxirə salmaq imkanı versə həm təhsilin, həm də hərbi xidmətin əhəmiyyətini taraz saxlamaq olar .
Cari vəziyyətdə təhsilin yarımçıq dayandırılması tələbənin şəxsi inkişafını, o cümlədən karyera imkanlarını məhdudlaşdıra bilər”.
