Ali məktəbə daxil olan tələbə ixtisasına aidiyyatı olmayan qeyri-ixtisas fənlərini də də oxumaq məcburiyyətindədir. Hətta mövzu ilə bağlı bu yaxınlarda elm və təhsil naziri Emin Əmrullayev çıxışında bildirdi ki, universitetlərdə keçirilməməli bir çox fənn var, lakin bu sahədə dəyişiklik etməyə hər kəs hazır olmalıdır.
Maraqlısı budur ki, fənlər tədris olunmasa, həmin müəllim işindən olmalıdır. Bəs, biz necə sistem quraq ki, nə müəllim zərər çəksin, nə də tələbə zamanını itirsin?
Mövzu ilə bağlı təhsil mütəxəssisi Elçin Süleymanov AzEdu.az-a açıqlama verib.
Müsahibimiz bildirib ki, illərlə eyni fənnin tədris olunması uğurlu nəticələr doğurmur:
“Müəllimlər sahələri üzrə yenilikləri təqib etməli, fənnini tələbələr üçün faydalı istiqamətdə inkişaf etdirməlidirlər. Bəzən müəllim 30 il eyni fənni tədris edir ki, bu da düzgün yanaşma deyil. Ümumiyyətlə bir-birinə bənzər fənlər arasında inteqrasiya olmalıdır.
Bu baxımdan cənab nazirin dediklərində həqiqət var. Günümüz sürət əsridir. Tələbələr qısa müddətdə daha çox məlumat almağa həvəslidirlər. Normaldır ki, ixtisaslarıyla əlaqəsi olmayan fənlər onlara maraqsız gəlir. Bu isə öz növbəsində dərsin keyfiyyətini aşağı salır”.
Müsahibimiz qeyd edib ki, semestr üzrə keçiriləcək fənləri əsas və köməkçi olaraq sistemləşdirmək lazımdır:
“Əsas fənlərin sillabus və proqramları inkişaf etmiş ölkələrdəki universitetlərin proqramları ilə müqayisə edilib, yenilənməlidir. Köməkçi fənlərdə isə alternativlər təqdim edilməlidir.
Türkiyə universitetlərində bu sahədə maraqlı bir sistem var. Belə ki, hər semestr üzrə tələbələrə keçiriləcək fənləri təqdim edirlər. Onlar öz seçimləri əsasında alternativ fənlərin kreditlərini götürə bilirlər”.
