Marketlərdə, apteklərdə, eləcə də mağazalarda ən yüksək qiymətə satılan məhsullar sırasında uşaq yeməkləri və geyimləri yer alır. Maraqlısı budur ki, böyüklər üçün olan qida və geyimlər uşaqlar üçün nəzərdə tutulan məhsullardan daha ucuz satılır.
Bəs, görəsən, bunun səbəbləri nələrdir?
Mövzu ilə əlaqədar iqtisadçı Natiq Cəfərli AzEdu.az-a açıqlama verib.
Müsahibimiz bildirib ki, Nazirlər Kabineti (NK) uşaqlar üçün olan qidaların satışında tətbiq olunan vergi rüsumunu ləğv etməlidir:
“Dünyada bir sıra araşdırmalar göstərir ki, 0-5 yaş aralığındakı uşaqların xərcləri digər yaş qruplarına nibətən daha çox olur.
Məhz bahalıq səbəbindən bir çox ölkələrdə körpəli ailələrə güzəştlər edilir. Belə ki, həmin ailələrə “uşaq pulu” adlandırdığımız sosial ödənişlər verilir, ya da vergi və gömrük sahələrində güzəştlər tətbiq olunur.
Ancaq təəssüf ki, bizim istifadə etdiyimiz uşaq yeməkləri Azərbaycanda istehsal olunmadığı üçün həmin qidalara müəyyən gömrük rüsumu tətbiq olunur. Bu da onların daha baha qiymətə satılmasına gətirib çıxarır”.
İqtisadçı qeyd edib ki, NK uşaq qidalarının, eləcə də geyimlərinin satışında tətbiq olunan vergi dərəcələrini ləğv etməlidir:
“Əgər NK sözügüdən məhsulların xaricdən ölkəmizə gətirilməsində tətbiq olunan gömrük və vergi rüsumlarını sıfırlasa, yaxud azaltsa, bundan sonra qiymətlər enə bilər”.
