Müşhadilər onu göstərir ki, abituriyentlər bölgələrdə yerləşən universitetlərə deyil, paytaxda olan ali təhsil müəssisələrinə qəbul olmaq üçün can atırlar. Bəziləri təhsilin keyfiyyətinə görə, bir qisim isə sırf məkan dəyişmək, paytaxta gəlmək üçün bu seçimi edirlər.
Mövzu ilə bağlı AzEdu.az-a danışan təhsil eksperti Ramin Nurəliyev qeyd edib ki, xərclər baxımından regionlar və Bakı arasında ciddi fərqlər var. Abituriyentlər məkan dəyişərkən bunu nəzərə almalıdırlar:
“Hesab edirəm ki, bölgələrdə yerləşən ali təhsil müəssisələrində oxumaq rayonda yaşayan tələbə üçün daha əlverişli olar. Çünki, rayonun xərcləri ilə Bakının xərci bir deyil. Bir tələbə rayonda aylıq 300-400 manat xərcləyəcəksə, bu, Bakıda 500-600 manat və daha çox edə bilər. Nəqliyyat, kirayə, qida və s. kimi xərclərdə regionlar və Bakı arasında 200 manat fərq olur”.
Müsahibimzi qeyd edib ki, rayonda yaşayan tələbənin Bakıya gəlib oxumağındansa, regionda təhsil alması daha yaxşı olar:
“Bəzi tələbələr var ki, xərcləri deyil, təhsilin keyfiyyətini, prestijli olmasını nəzərə alaraq Bakıda yerləşən ali təhsil müəssisələrinə seçim edirlər. Ancaq bir məqam var ki, bəzi ixtisasları abituriyentlər yalnız Bakıda yerləşən universitetlərdə oxuya bilərlər. Məsələn, buna neftlə bağlı ixtisasları aid edə bilərik. Bu sahəni seçən gənclər məcburdur ki, BANM-də və ya Azərbaycan Neft və Sənaye Universitetində (ADNSU) oxusunlar.
Həmçinin, UNEC-in iqtisadiyyatında oxumaqla, region universitetində iqtisadiyyat oxumaq arasında əlbəttə ki, böyük fərq var. Bu açıq-aydın müşahidə olunur.
Amma qəbul imtahanından 250 bal toplayan tələbə iqtisadiyyat üzrə təhsil almaq istəyirsə, həmin balnan ya özələ, ya da region universitetlərindən birinə düşə bilər. Bu halda onların Bakıya gəlmələrindənsə, region universitetlərini seçim etmələrinin lehinəyəm”.
R.Nurəliyev qeyd edib ki, Bakıda mülkləri olan bir çox valideyn övladının rayondan paytaxta gəlməsini problem olaraq görmür:
“Bu zaman onların kirayə dərdi olmadığı üçün rahatlıqla Bakını seçim edə bilirlər. Onu da qeyd etmək istərdim ki, ixtisas seçimi zamanı Bakıda evi olmayan bəzi valideynlərdən soruşuram ki, niyə görə qaldığınız yerə yaxın ali məktəb deyil, sırf Bakıya seçim etmək istəyirsiniz? Cavab olaraq qeyd edirlər ki, ondan sonra qohum-əqrəba övladımın balının Bakıya çatmadığını, məcbur olaraq region universitetini seçim etdiyimizi söyləyər. Yəni bu düşüncədə olan valideynlər də var...”.
