“Bizim peşakar, tanınmış, öz işini yüksək səviyyədə bacaran müəllimlərimiz çoxdur”.
Bu sözləri AzEdu.az-a açıqlama verən təhsil üzrə mütəxəssis İlqar Orucov bildirib.
O, qeyd edib ki, son illərdə müəllimlərin sosial vəziyyətinin yaxşılaşdırılması istiqamətində müvafiq addımlar atılıb:
“Sertifikasiyanın nəticələrinə uyğun diferensiallaşma müllimlərin əməkhaqlarına müsbət təsir etdi. Bu addımlar müəllim olmaq istəyənlərin sayını artırır.
Müəllimin nüfuzunun artması isə bütövlükdə cəmiyyətin, dövlətin ona qarşı münasibətinə təsir edəcək faktordur”.
İ. Orucov qeyd edib ki, müəllim olmaq üçün təkcə bilik, savad deyil, bu sahəyə maraq və sevgi olması da vacib nüanslardandır:
“Müəllimlik ürəkdən gələn bir peşədir. Elə bir peşədir ki, heç bir sahəyə oxşamır. Burada biliklə bərabər səriştə və bacarıqlar önəmlidir. Yaxşı pedaqoq və psixoloq olmağı bacarmaq lazımdır. Çünki müəllimin işlədiyi toplum müəllimin peşəkarlığını zəruri edir. Məlumdur ki, peşəkar müəllimlər müəyyən təcrübəyə malik, ömrünün böyük bir hissəsini bu peşəyə vermiş insanlardır.
Onu qeyd etmək lazımdır ki, son illərdə tətbiq edilən sertifikasiya imtahanları müəllimlərin peşəkarlıq səviyyəsini ortaya çıxarır. Peşəkar müəllimlər istər azyaşlı, istərsə də yuxarı sinif şagirdləri ilə ünsiyyət qurmağı bacarmalı, dərsi əyləncəli etməklə yanaşı, həm də tələbkar olmağı bacarmalıdır. Davranışı ilə cəmiyyətə, öz kollektivinə nümunə olmalıdır. Bizim peşakar, tanınmış, öz işini yüksək səviyyədə bacaran müəllimlərimiz çoxdur”.
