Müşahidələr onu göstərir ki, artıq eynək taxan uşaqların sayı günbəgün artmaqdadır.
Hazırda təkcə böyüklər deyil, azyaşlılar da göz zəifliyindən əziyyət çəkirlər.
Bəs, görəsən, hansı amillər göz zəifliyinə və ya göz xəstəliklərinə səbəb olur?
Məsələ ilə bağlı AzEdu.az-a oftalmoloq Ergün Rəşidəlizadə danışıb.
“Göz zəifliyinə səbəb olan bir çox faktor var. Bunlar içərisində genetik faktor ön plandadır. Əgər ailədə göz zəifliyi və ya hansısa xəstəlik mövcuddursa, bu, gələcək nəslə təsir göstərə bilər. İnsanların genetik materialları qarışdıqca hansı genlər dominant xarakter daşıyırsa, o, yayılmağa başlayır. Zaman keçdikcə bu genlər pozulduğuna görə, əhali arasında göz xəstəlikləri getdikcə yayılmağa davam edir”.
Müsahibimiz qeyd edib ki, fasiləsiz dərs oxumaq, texnoloji vasitələrdən çox istifadə etmək göz zəifliyinə gətirib çıxarır:
“Dərs proqramı ağır olduğundan gənclər gecə-gündüz demədən dərs oxuyurlar. Təbii olaraq bu onların gözlərinə mənfi təsir göstərir.
Ekoloji və qidaların göz xəstəliklərinə təsiri isə müzakirə mövzusudur. Çünki bu sahədə geniş araşdırmalar aparılmayıb”.
Oftalmoloq qeyd edib ki, göz zəifliyindən ən çox əziyyət çəkən peşə sahibləri saatsaz, zərgərlər və toxuculardır:
“Onu da qeyd edim ki, yaxın və uzağı düzgün təyin edərək baxmamaq göz zəifliyinə səbəb olur.Məsələn, saatsaz, zərgərlər və toxucular çox yaxına baxaraq işləməli olduqlarına görə göz zəifliyindən əziyyət çəkə bilirlər.
Uşaqlar dərs hazırlayanda, mütaliə ilə məşğul olanda diqqətli olmalı, məsafəni və otağın işıqlandırılmasını düzgün tənzimləməlidirlər. Əgər ailədə irsi olaraq göz zəifliyi varsa, valideynlər övladlarını vaxtında yoxlatmalı, vacib olduğu təqdirdə eynəklə təmin etməlidirlər”.
