Müşahidələr onu göstərir ki, böyük, kiçik demədən hər kəs sosial şəbəkələrdən istifadə edir. Hətta azyaşlıların sosial mediada aktivliyi böyükləri üstələyir.
Etiraf etmək lazımdır ki, sosial şəbəkələrdə cəmiyyətə qarşı hörmətsizlik, mənəvi dəyərlərə uyğun olmayan qeyri-etik paylaşımlar günbəgün artmaqdadır. Bu isə uşaqların psixologiyasına birmənalı olaraq təsir edir.
Mövzu ilə bağlı AzEdu.az-a açıqlamasında psixoloq Əfsanə Rüstəmova qeyd edib ki, uşaqların sosial şəbəkələrdən düzgün istifadə etməməsi, məhz valideynlərindən qaynaqlanır:
“İnsanların real həyatlarına ayırdıqları vaxtın azalması onların sosial rifahlarının aşağı düşməsindən irəli gəlir. Belə ki, canlı görüşlərdən qaçan insanlar sosial mediada tanıdığı və ya tanımadığı insanlarla söhbət edərək sosiallaşma ehtiyaclarını ödəməyə çalışırlar. Bu proses həm də uşaqlar üçün yaranır. Onlar sosial ehtiyaclarını dostları ilə əylənərək, məktəbdə, parkda və s. ödəməlidir. Lakin rəqəmsal mühitə üstünlük verməyə başlayıblar”.
Psixoloq vurğulayıb ki, insanlar evdən çıxmağı maddi olaraq bahalı hesab etdiyi üçün evə qapanırlar:
“Əvvəllər uşaqların çöldə oynadıqları oyunları indi evdəki telefonlar əvəz edib. Burada problemin səbəbkarı kimi valideynləri görə bilərik. Uşaqlar elədir ki, ailələrindən örnək alaraq təkrarlamağa başlayırlar.
Online kitab oxuyan, online iclaslara, təlimlərə qatılan valideynlərin övladları telefonu daha çox təhsil üçün yararlı görürlər. Ancaq işdən evə gələn kimi sosial mediaya daxil olub “Tik Tok”a baxan valideynlərin övladları isə telefondan yalnız zövq üçün istifadə edirlər”.
