İstər ərzaq, istər geyim, istərsə də digər məhsullar xeyli bahalaşıb. Bir çox ailələrin isə gəliri az, aylıq xərcləri isə çoxdur. Ona görə də cəmiyyət uşaq pulunun verilməsini istəyir.
Buna səbəb isə uşaqların istər qida, istər geyim, istərsə də təhsil xərcinin çox olmasıdır.
Mövzu ilə bağlı AzEdu.az-a açıqlama verən sosioloq Lalə Mehralı qeyd edib ki, statistikalara görə əhali artımı məsələsində geriləyirik:
“Artıq xərclər çoxalıb, gəlir isə azalıb. Bazar iqtisadiyyatı elə inkişaf edir ki, insanlar gəlirləri ilə xərclərini tənzimləməkdə çətinlik çəkirlər. Xərclərə adekvat gəlirin olmaması bir çox ailəni çətin vəziyyətə qoyur. Əksəriyyətimiz daha ucuz ərzaq və geyim almaq məcburiyyətində qalırıq. Buna səbəb isə təbii ki, gəlirlərin stabil qalması fonunda xərclərin çoxalması və bahalıqdır.
Ona görə də aylıq uşaq pulunun verilməməsi doğru deyil. Çünki, hazırki demokratik vəziyyət şərtləndirir ki, ailələrdə dünyaya uşaq gətirmə faizi yüksəlsin”.
Sosialoq vurğulayıb ki, dövlət uşaqların böyüməsində ailələrə dəstək olmalıdır:
“Bəzən elə düşünürük ki, uşaq bizimdir və bütün xərclərini özümüz qarşılamalıyıq. Amma övladlarımız həm də dövlətindir. Bütün xərcləri dövlət və valideyn ortaq qarşılaya bilər. Ona görə də uşaq pulunun verilməsi vacib məsələdir. Amma hazırda təkcə 6 və ya daha çox uşaqlı ailələrə müəyyən imtiyazlar verilir. Ona görə insanların nəsil artırmağa marağı yoxdur. Düşünürlər ki, 3 və daha çox uşaq dünyaya gətirdikdə daima ehtiyac içərisində yaşayacaqlar. Sonuncu dəfə satatistika açıqlananda məlum oldu ki, ciddi formada əhali azlığına doğru gedirik. Uşaq pulunun verilməməsi də bu statistikaya təsir edən amillərdən biridir”.
L.Mehralı qeyd edib ki, bu məsələnin parlamentdə müzakirəsi vacibdir:
“Hesab edirəm ki, bununla bağlı bir mexanizim işlənməli, hesab aparılmalı və heç olmasa müəyyən yaş qrupuna aid olan uşaqlar üçün dövlət dəstəyini göstərə bilməlidir”.
