“Təhsil haqqında” qanuna edilən dəyişikliyə əsasən, məktəbdə ilk dəfə işə qəbul olunan müəllimlərin sertifikasiyadan azad olma müddəti 5 ildən 3 ilə endirilib.
Bəs bunun nə kimi nəticələri olacaq?
Mövzu ilə bağlı AzEdu.az-a açıqlamasında təhsil eksperti Elşən Qafarov sertifikasiya ilə bağlı yeni dəyişikliklərin doğru olmadığı qənaətindədir:
“Artıq parlament dəyişikliyi qəbul etmişdi, ölkə prezidentinin dünənki sərəncamı ilə təsdiq olundu. Bir mütəxəssis kimi düşünürəm ki, edilmiş dəyişiklik doğru deyil. 2020-dən işə qəbul olunanlar üçün şamil oluna bilərdi ki, bu il 3, növbəti illər isə 4 və 5 il olaraq artırılsın. Çünki MİQ-in formatı 2020-dən belə dəyişib”.
E.Qafarov qeyd edib ki, 60 və yuxarı yaşlı müəllimlərin sertifikasiyada könüllü iştirakı qəbuledilməzdir:
“Eyni zamanda, 60 və yuxarı yaşlı müəllimlərin sertifikasiyada könüllü iştirakı da qəbuledilməzdir. Azərbaycan Respublikasında əmək münasibətləri əməık qanunvericiliyi ilə ölçülür. Əmək Məcəlləsinin 16-cl maddəsində göstərilir ki, cinsinə, yaşına, sosial mənsubiyyətinə, dininə görə işçilər arasında ayı-seçkilik salmaq olmaz. Burada da yaşa görə ayrı-seçkilik məsələsi var. Düşünürəm ki, bu daha çox güzəşt xarakterlidir və təhsil sahəsində əsas prioritet şagird olmalıdır. Bu cəhətdən edilmiş dəyişiklikləri müsbət qiymətləndirə bilməyəcəyəm”.
