Bu ilin yay aylarında bağçalara qəbul elan ediləcək.
AzEdu.az xəbər verir ki, bu barədə Elm və Təhhsil Nazirliyinin Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev bildirib.
O qeyd edib ki, bağçalara qəbul ildə bir dəfə açılır.
“Bağçalara qəbul ildə bir dəfə, yay aylarında elan edilir. Lakin qəbuldan sonra da boş qalan yerlərə qeydiyyat aparılır”,- deyə o əlavə edib.
Elnur Əliyev bağçalardakı yer çatışmazlığından da söz açıb.
Bildirib ki, Bakı, Sumqayıt və Abşeronda fəaliyyət göstərən elə uşaq bağçaları var ki, 300-ə yaxın valideyn növbə gözləyir.
O qeyd edib ki, qeydiyyatdan keçib gəlməyən uşaqların bağçadan xaric olunması prosedurunun işlənilməsi nəzərdə tutulur.
“Bunun üçün normativ sənədlərə düzəliş ediləcək. Növbədə dayanan valideynlərin uşaqları bağçaya yerləşdirə bilməsi üçün şərait yaradılmalıdır”,- deyə o əlavə edib.
Nazirlik rəsmisinin sözlərinə görə, hazırda 1-5 yaşlı uşaqların məktəbəqədər təhsil müəssisələrinə (uşaq bağçaları) cəlbi 35 % təşkil edir.
Bu göstəricinin 2026-ci ilə qədər 50 %-ə çatdırılması qarşıya məqsəd kimi qoyulub.
