"İlin gənc müəllimi “Gəncə şəhər İsmət Qayıbov adına 1 nömrəli tam orta məktəbin direktor müavini, ingilis dili müəllimi" Leyla Camalzadə direktor müavinlərinin diaqnostik qiymətləndirməsində yüksək bal toplayıb.
Belə ki, o, imtahanda 74 bal toplayaraq uğur qazanıb.
AzEdu.az bu münasibətlə Leyla Camalzadə ilə əlaqə saxlayıb.
O, təəssüratlarını bizimlə bölüşüb.
- Leyla müəllim, ilk növbədə sizi təbrik edir, gələcək fəaliyyətinizdə uğurlar arzulayıram. Direktor müavinləri üçün keçirilən imtahanda yüksək nəticə əldə etmisiniz. Bu uğura aparan əsas amillər nələr oldu?
- Edison deyib ki, "uğurun düsturu 1% savad, 99 % isə tərdir". Düşünürəm ki, əldə olunan bütün uğurların altında yuxusuz gecələr, yorğun günlər,çox çalışan gec saatlar və xüsusilə də ailəsinə və özünə ayrıla bilməyən saatlar durur. Mən də digər həmkarlarım kimi və uğurlu insanlar kimi hər zaman özüm öz üzərimdə çalışmışam. Olduğum yerlə, olmaq istədiyim yer arasında bir körpü salmışam.
Yeganə rəqibim dünənki mənəm, olmaq istədiyim və bənzəmək istədiyim insan isə sabahkı mənəm. Həyatım boyunca heç kəslə özümü müqayisə etməmişəm. Kimdənsə daha yaxşı olmağa çalışmamışam. Yalnız bir insanla yarışmışam - o da güzgüdəki mən. Hesab edirəm ki, qazandığım bütün uğurların əsasında disiplinli, çalışqan və məsuliyyətli olmaq dayanır.
Əslində, bundan bir il yarım əvvəl direktor müavini imtahanında uğur qazanmışam və Gəncə şəhəri İsmət Qayıbov adına 1 nömrəli məktəbə tədris işləri üzrə direktor müavini kimi təyin olunmuşam. Yəni, mütəmadi olaraq imtahanlara girdiyim üçün artıq imtahan mənim üçün bir həyat prinsipinə çevrilib.
Bu, sanki bir rutindir. Bu imtahanın digər imtahanlardan fərqi ondan ibarət idi ki, bu, diaqnostik xarakter daşıyırdı. Əslində, idarəetmədəki boşluqları və müavinlərin ehtiyaclarını müəyyən etmək üçün bu cür imtahanın keçirilməsi labüd idi.
Bu yaxınlarda direktorlarla bağlı diaqnostik qiymətləndirmə həyata keçirildi. Hər bir direktorun hansı sahə üzrə ehtiyacı varsa, onlar qruplaşdırılaraq müvafiq təlimlərə cəlb olundu. Bu prosesin nəticələri özünü çox yaxşı şəkildə göstərdi. Növbəti mərhələ isə direktor müavinləri idi.
Qısa müddət ərzində bizə bildirildi ki, sabah imtahandır. Təbii ki, bir anlıq düşünürsən: "Bir dəfə imtahan verib gəlmişəm, indi yenidən imtahan olunuram". Lakin bu, məni qorxutmadı. İstər sertifikasiya, istərsə də diaqnostik qiymətləndirmə olsun, bu cür qiymətləndirmə proseslərini yüksək qiymətləndirirəm.
Hər şeydən əvvəl bu, insanın özü üçün vacibdir. İnsan bu cür qiymətləndirmələr vasitəsilə nələri yaxşı bildiyini, hansı boşluqlarının və zəif cəhətlərinin olduğunu, eləcə də üstünlüklərini aydın şəkildə görə bilir.
Bu imtahanın ən müsbət cəhətlərindən biri də ondan ibarət idi ki, imtahanda nəzarətçilər adi təhsil müəssisələrində çalışan pedaqoji işçilər və ya sıravi əməkdaşlar deyil, məhz idarənin əməkdaşları idi. Bu isə imtahanın nə qədər obyektiv və şəffaf keçirildiyini göstərirdi.
Düşünürəm ki, bu cür qiymətləndirmələr yalnız direktorlar və direktor müavinləri üçün deyil, digər bütün sahələr üzrə də həyata keçirilməlidir. Çünki ilkin və yekun qiymətləndirmələrin müqayisəsi nəticəsində hər bir şəxs öz inkişaf səviyyəsini və hansı nöqtədən haraya gəldiyini aydın şəkildə görə bilər. Aparılan islahatlar yalnız daha yaxşı və keyfiyyətli təhsil üçün atılan vacib addımlardır.
- Sualların asanlıq və ya çətinlik səviyyəsi ilə bağlı nələri qeyd etmək istərdiniz?
- İmtahan suallarının istər dünyagörüşü, ədəbiyyat, istərsə də coğrafiya və tarix kimi müxtəlif sahələri əhatə etməsi onu göstərir ki, bir direktor müavini yalnız öz sahəsi üzrə idarəetmə biliklərinə malik olmamalıdır. Eyni zamanda məntiq, kurikulum, qanunvericilik, idarəetmə və əmək məcəlləsinə dair suallar da müavinin gündəlik iş prinsipləri və vəzifələri ilə bilavasitə əlaqəli idi. Bu isə onu göstərir ki, bir müavin hərtərəfli biliyə sahib olmalıdır.
Suallar olduqca düşündürücü idi. Diqqətimi çəkən əsas məqamlardan biri suallara eyni balın verilməməsi oldu. Belə ki, onların çətinlik dərəcəsinə uyğun olaraq suallar 1, 2, 3, 4 və 5 balla qiymətləndirilmişdi. Ən çətin suallar isə xüsusilə müavinin işi ilə birbaşa bağlı olan qanunvericiliklə əlaqəli suallar idi. Bu suallar 5 ballıq şkala üzrə dəyərləndirilirdi. Bu yanaşma hər bir səviyyənin və bilik sahəsinin nəzərə alındığını göstərir.
- Gələcəkdə direktor olmaq hədəfiniz varmı?
- Bəli, gələcəkdə direktor vəzifəsində çalışmaq istəyirəm. Bundan əlavə dekabrda keçirilən direktorların işə qəbulu imtahanının test mərhələsində uğur qazanmışam və digər mərhələlərin nəticələrini də gözləyirəm.
- Bu vəzifədə əsas prioritetləriniz nələr olacaq?
- Mənim üçün hər zaman ən ali zirvə insan olmaqdır. Həyatda “Bu mənə yaraşmaz” prinsipi ilə hərəkət etmək lazımdır. Düşünürəm ki, keyfiyyət heç vaxt təsadüfi olmur. İnsan yalnız özünə yaraşan davranışları seçməlidir. Bu yolda mənim üçün əsas prioritetlər vicdanlılıq, ədalət və mərhəmətdir.
Ədalət prinsipi mənim üçün xüsusi önəm daşıyır. Bir rəhbər heç vaxt kiməsə və ya işçilərə qarşı qərəzli münasibət göstərməməli, vicdan və obyektivlik prinsiplərinə sadiq qalmalıdır.
- Müasir dərs modelində hansı yenilikləri tətbiq edirsiniz?
- Rəhbər vəzifə ilə yanaşı, mən həm də ingilis dili müəllimiyəm. Bizim əsas prioritetlərimizdən biri dərsləri ən müasir tədris standartlarına uyğun şəkildə keçirməkdir. Artıq ənənəvi sistemdən uzaqlaşmışıq və dərslərimizi STEAM metodologiyası ilə əlaqələndiririk.
Məsələn, bu yaxınlarda “Geyimlər” mövzusu üzrə dərsimiz var idi və biz şagirdlərlə birlikdə bir moda nümayişi hazırladıq. Uşaqlar geyindikləri paltarların adını çəkərək, onlar haqqında danışacaqlar. Bu yanaşma həm onların danışıq bacarıqlarını inkişaf etdirir, həm də dərsi maraqlı və interaktiv edir. Şagirdlər bu prosesdə həm əylənir, həm də öyrənirlər.
Eyni zamanda fənn aylıqları çərçivəsində divar qəzetləri hazırlanır. Biz həmin dərsləri mövzuya uyğunlaşdıraraq dərsdənkənar fəaliyyətlərə inteqrasiya edirik. Şagirdlərə 10–15 dəqiqəlik əyləncə xarakterli STEAM tapşırıqları veririk və onlar öz divar qəzetlərini bu istiqamətdə hazırlayırlar.
Dərslərimdə şagirdlərə hər zaman deyirəm: “Qətiyyən susmayın, nə bilirsinizsə danışın". Çünki dərsdə işgüzar səs-küy vacibdir - bu, öyrənmənin canlı göstəricisidir. Bəzən dərsləri “tərs sinif” modeli ilə keçiririk. Mən daha çox esse xarakterli dərslərə üstünlük verirəm. Ən vacib məsələ isə şagirdlərin maraq və meyllərinin diqqətlə nəzərə alınmasıdır.
- 5 il sonra təhsillə bağlı özünüz və rolunuzu necə görürsünüz?
- Ümumiyyətlə, insan daim yüksələn xətlə öz fəaliyyətini inkişaf etdirməlidir. Hər hansı bir mühitə alışdıqdan sonra komfort zonasından çıxmağı bacarmalıdır. Mən özüm də hər zaman bir yerə öyrəşdikdən sonra artıq orada yetərincə faydalı olmadığımı düşünürəm. Bu səbəbdən də daim yenilik axtarışındayam.
Təkcə öz sahəmlə kifayətlənmirəm. Araşdırma aparmağı, yeniliklərdən xəbərdar olub bunları kollektivimizlə bölüşməyi və dərslərimdə tətbiq etməyi çox sevirəm. Mənim çatmaq istədiyim zirvə, bütün müəllimlərin özlərini bir pillə də olsa irəli aparmalarıdır. Həmçinin, arzum hər bir müəllimin əlindən tutub onları da bu yolda özümlə irəli aparmaqdır. Çünki inanıram ki, onlar gələcəkdə daha yüksək mövqelərdə olacaqlar. Müəllimlərin daxilində bir günəşin parladığına inanıram.
Özümü beş il sonra daha böyük layihələrin icraçısı və bir neçə kitabın müəllifi kimi görürəm. Yəni, bu gün olduğum pillədən bir pillə də yuxarıda olmaq istəyirəm. Bu isə təkcə vəzifə üçün deyil, insanlara daha faydalı olmaq üçün irəliləmək arzusundan irəli gəlir. Hər zaman bir addım öndə olmaq istəyirəm ki, daha çox insana yol göstərə bilim.
