Danimarka, Finlandiya, İsveç, Norveç və İslandiya kimi Skandinaviya ölkələri təhsil sisteminin inklüzivliyi, oyun və təbiət yönümlü təhsil metodları sayəsində dünyada məktəbə “sevinclə” gedən uşaqların ən çox olduğu regionlar olaraq tanınırlar.
AzEdu.az-ın araşdırmasına əsasən, bu modellər arasında uşaqlara “az akademik təzyiq, çox sərbəstlik və təbiətdə öyrənmə” kimi elementlər verən bir yanaşma xüsusilə önə çıxır.
Danimarkada uşaqlar məktəbə gec başlayır (6 yaşlarında) və 11 yaşına qədər ev tapşırığı verilmir. Açıq havada oynamaq, təhlükəsiz risklər götürmək və oyun üzərində qurulan inkişaf uşaqların özünəinamını və xoşbəxtliyini artırır.
Norveçdə uşaqlar uşaq bağçasından başlayaraq açıq havada çox vaxt keçirirlər. “Friluftsliv” sayəsində həm fiziki, həm də psixoloji rifahları güclənir.
Norveç təhsil sistemi rəqabətdən çox, sosial aidlik və emosional özünü tənzimləmə bacarıqlarını önə çəkir. Müəllimlər və tələbələr arasında bərabər münasibət formalaşdırılır, siniflərdə sıx test və yarışma olmur, bu da stressi azaldır.
Məsələn, İsveçdə “inskolning” adlı tətbiq var. Məktəbə yeni başlayan uşağın valideyni ödənişli icazə alaraq adaptasiya dövründə məktəbə getməsinə icazə verilir ki, uşağın yeni mühitə rahatlıqla alışması təmin edilsin.
Beləliklə bu ölkədəki uşaqlar məktəbi daha çox “oyunla öyrənmək”, “təbiətdə sərbəst olmaq”, “aşağı stresli, dəstəkləyici və inklüziv bir mühit” kimi görürlər. Bu isə onları həm akademik, həm də psixoloji cəhətdən güclü, məmnun və həyəcanlı edir. Təhsil sistemi yalnız bilik yığımı deyil, uşağın ümumi inkişafı və rifahı üzərinə quruludur bu isə məktəbə sevinc gətirən əsas amillərdəndir.
