Əfqanıstanda Talibanın qızların orta təhsilinə qoyduğu qadağaya baxmayaraq, minlərlə şagird gizli məktəblərdə dərs almağa davam edir. Keçmiş təhsil məsləhətçisi Parasto Hakim və onun komandası ölkənin 16 əyalətində gizli təhsil şəbəkəsi quraraq 2,800-ə yaxın qızın dərslərə qatılmasına şərait yaradır.
AzEdu.az xarici mənbədən aldığı məlumata əsasən xəbər verir ki, dərslər həm ənənəvi şəkildə, həm də onlayn formatda keçirilir.
Google Meet və WhatsApp kimi platformalar vasitəsilə təşkil olunan onlayn dərslər təhlükəsizlik məqsədilə tikiş və əl işləri dərsləri adı altında gizlədilir. Müəllimlər dərs materiallarını diqqət çəkməmək üçün xüsusi şəkildə hazırlayır.
Beynəlxalq təşkilatlar bu təşəbbüsü yüksək riskli, lakin həyati əhəmiyyətli addım kimi qiymətləndirir və uzunmüddətli təhsil qadağalarının ölkənin gələcəyinə mənfi təsirlərinə diqqət çəkirlər.
