12 may 2025-ci il tarixində Bakı şəhəri 295 nömrəli tam orta məktəbdə "Konstitusiya və Suverenlik ili"çərçivəsində yaddaqalan və maarifləndirici bir tədbir – “Rənglərin işığında” adlı ustad dərsi təşkil olunub.
AzEdu.az xəbər verir ki, tədbirin fəxri qonağı Milli Məclisin deputatı, Azərbaycan Respublikasının Əməkdar rəssamı Ülviyyə xanım Həmzəyeva olub.
O, məktəbin müəllim və şagird kollektivi ilə səmimi görüş keçirib, onlarla incəsənətin sirrləri, rənglərin dili və rəssamlığın insan düşüncəsinə təsiri barədə maraqlı fikir mübadiləsi aparıb.
Ustad dərsi zamanı Ülviyyə xanım şagirdlərə rəssamlıq sənətinin incəliklərindən, rənglərin bir-birinə uyğunlaşdırılmasından və kompozisiyada ahəngin yaradılmasından bəhs edib. Azərbaycanın dahi rəssamları haqqında geniş məlumat verib, Nardaran torpağının tarixində iz qoymuş şəxsiyyətləri xatırladıb.
Tədbir ərzində o, şagirdlərin suallarını cavablandıraraq, onlarla qarşılıqlı dialoq şəklində söhbət aparıb. Maarifləndirici xarakter daşıyan bu dərsin əsas məqsədi məktəbin “Gənc rəssamlar” dərnəyinin üzvlərinə rəssamlıq texnikasından düzgün istifadə qaydalarını öyrətmək və bunu əyani şəkildə nümayiş etdirmək olub.
Bu cür tədbirlər şagirdlərdə incəsənətə olan marağı artırmaqla yanaşı, onların yaradıcılıq potensialını üzə çıxarmaqda mühüm rol oynayır.
