“İşğaldan azad olunan bölgələrə digər regionlarda yaşayan müəllimləri səfərbər etmək lazımdır”.
Bunu AzEdu.az-a açıqlamasında Azərbaycan Yazıçılar Birliyinin Hərbi Vətənpərvərlik Komisiyasının sədri, tanınmış hərbi mahnıların müəllifi Şahin Musaoğlu deyib.
O, düşmən tapdağından azad olunan bölgələrdə təhsilin inkişaf etdirilməsi üçün bir sıra tədbirlərə əl atmağın vacib olduğunu qeyd edib:
“Hazırda pandemiya şəraiti ilə bağlı tədrisi tam şəkildə ənənəvi formada təşkil etmək mümkün deyil. İşğaldan azad olunan torpaqlarımızda təhsilin inkişafı orada infrastrukturun hansı şəkildə qurulmasından aslıdır. Ölkəmiz Cocuq Mərcanlını düşmən əsarətindən xilas etdikdən sonra orada təhsili pilləli şəkildə qurdu. İlk olaraq məktəblər açıldı və onun strukturu yeniləndi.
İşğaldan azad olunan bölgələrimizə mütəxəssislər göndərilməlidir. Onlar təcrübəli müəllim kollektivindən təşkil olunmalıdır. Həmin torpaqlara ölkənin digər regionlarında yaşayan müəllimləri səfərbər etmək lazımdır. Onlar Azərbaycan dili, fizika, kimya kimi fənlərlə yanaşı şagirdlərə vətənpərvərlik dərsini də tədris etməlidilər. Gənc şagirdlərimizə torpaqlarımızı necə aldığımızı, onun uğrunda hansı çətinliklərlə mübarizə apardığımızı düzgün şəkildə anlatmalıyıq. Övladlarımıza ərazilərimizə sahiblənmək duyğusunu aşılamalıyıq. Onlar dövlətimizin adət-ənənələrini qoruyub saxlamalı və soy-kökə bağlı böyüdülməlidir. Gənclərimizin ruhunu diri saxlamalıyıq.
Tədris istənilən halda Təhsil Nazirliyi tərəfindən xüsusi proqram vasitəsi ilə tərtib olunacaq. Lakin işğaldan azad olunan ərazilərdə müəllimlərin şəxsi təşəbbüslərinə böyük ehtiyac var”.
Şahin Musaoğlu AYB-nin Hərbi Vətənpərvərlik Komissiyasının indiki şəraitdəki fəaliyyətindən də söz açıb:
“Azərbaycan Yazıçılar Birliyinin tərkibində Hərbi Vətənpərvərlik Komissiyamız fəaliyyət göstərir. Bizim çox hörmətli şairimiz Zəlimxan Yaqub bu komissiyanın rəhbəri idi. O, dünyasını dəyişdikdən sonra Anar müəllim həmin vəzifəni mənə təklif etdi. Mən 2016-cı ildə sədrliyə başladığım zaman Aprel döyüşləri baş verdi. Biz o dönəm Azərbaycan Yazıçılar Birliyi olaraq Müdafiə Nazirliyi ilə AYB arasında memorandum imzaladıq. Mən, Anar müəllim, Fikrət Qoca, Sabir Rüstəmxanlı, akademik Nizami Cəfərov və bir çox nümayəndə ilə Müdafiə Nazirliyinə getdik. Bu təşəbbüsümüzdən ölkə başçısının da xəbəri var idi. Ümumi proqram əsasında biz bayram və digər xüsusi günlərdə tədbirlər keçirməyi nəzərdə tutduq. Zakir Həsənov gənc yazıçı və şairlərimizi bir ay hərbi hissəyə ezam olunmasına icazə verdi. Biz həmin bölgələrdə əsgərlərin həyat tərzini müşahidə edərək, material hazırlamalı idik.
Bu il məlum hadisələrə görə cəbhə bölgəsinə gedə bilmədik. Hazırda bizim savaş ədəbiyyatımız formalaşır. Bu göstəriş və əmr əsasında yaranmır. Şair və yazıçılarımız Qarabağ müharibəsi ilə bağlı esse və romanlar yazırlar. Eyni zamanda müharibənin sosial, iqtisadi tərəfləri işıqlandırmalıdır. Lakin onun bir çox gerçəklikləri var. Arxa cəbhədə baş verən hadisələr işıqlandırılmalıdır. Hamı ön cəbhədə igidlik göstərmir, burada fərari və satqınlıqlar da olur. Hazırda biz hərb tariximizi yazan əsgərlərimizin fəaliyyətini kağızlara köçürürük. Ədəbiyyat tarixin güzgüsüdür. Müharibə yeganə mövzudur ki, yazıçı fantaziyası onun köməyinə gəlmir, burada əsas olan müşahidəçilik qabiliyyətidir”.
