Yunanıstandan olan alimlər uşaqlara süni intellektin əsas anlayışlarını əyləncəli formada öyrətmək üçün yeni tədris modeli hazırlayıblar.
AzEdu.az xəbər verir ki, tədqiqatçı Nikolaos Sampanis tərəfindən hazırlanmış yanaşma süni intellektin prinsiplərini - qərarvermə, nümunə tanıma və öyrənmə prosesi kimi anlayışları, oyun və interaktiv fəaliyyətlər üzərindən uşaqlara çatdırmağı hədəfləyir.
Alimlərin fikrincə, bu metod uşaqlarda həm texnologiyaya marağı artıracaq, həm də gələcəkdə AI əsaslı peşələrə yönəlməyi asanlaşdıracaq. Oyunlar vasitəsilə uşaqlar alqoritmik düşünmə, səbəb-nəticə əlaqəsi qurmaq və problemləri sistemli şəkildə həll etmə bacarıqları qazanacaqlar.
Sampaniyə görə, bu tədris modeli müəllimlər üçün də yeni imkanlar yaradır: dərs prosesi daha canlı olur, uşaqların diqqət intervalı uzanır və təlim motivasiyası yüksəlir.
Hazırda model Yunanıstanın bir neçə məktəbində pilot şəkildə sınaqdan keçirilir. Uğurlu nəticə əldə olunacağı təqdirdə, proqramın Avropa ölkələrində də tətbiqi nəzərdə tutulur.
