AzEdu.az ötən həftənin təhsil icmalını təqdim edir:
Yola saldığımız həftədə- 11-17 aprel tarixində təhsil sahəsində nələrin baş verdiyinə qısa nəzər salaq:
Buraxılış imtahanlarının nəticələri elan olunub:
Tam (11 illik) orta təhsil səviyyəsi üzrə 12-13 mart 2022-ci il tarixlərində keçirilmiş buraxılış imtahanlarının nəticələri elan olunub.
Buraxılış imtahanlarında 3 nəfərdə telefon aşkarlanıb:
Bu gün ümumi (9 illik) orta təhsil səviyyəsi üzrə keçirilən buraxılış imtahanlarında 3 nəfərdə mobil telefon aşkarlanıb.
Bu barədə Dövlət İmtahan Mərkəzindən (DİM) məlumat verilib.
IX sinif şagirdləri üçün buraxılış imtahanı keçirilib:
Dövlət İmtahan Mərkəzi (DİM) 12 şəhər və rayonda ümumi (9 illik) orta təhsil səviyyəsi üzrə buraxılış imtahanı keçirib.
Bu barədə DİM-dən məlumat verilib.
İki nəfərdə mobil telefon aşkarlandığı üçün imtahandan xaric edilib:
IX sinif şagirdlərinin buraxılış imtahanı zamanı 2 nəfərdə mobil telefon aşkarlandığı üçün imtahandan xaric edilib.
Təhsil naziri Emin Əmrullayev Məktəbəqədər təhsil proqramı (kurikulumu) nı təsdiqləyib:
Əmrə əsasən, Təhsil Nazirliyinin 1998-ci ildə təsdiq edilmiş “Məktəbəqədər müəssisələrdə tərbiyə və təlim proqramı” və Nazirliyinin 10 iyul 2012-ci il tarixli 1329 nömrəli əmri ilə təsdiq olunmuş “Azərbaycan Respublikasında məktəbəqədər təhsil proqramı (kurikulumu) (3-6 yaş)” ləğv edilib.
Bu il uşaq bağçalarının tərbiyəçiləri üçün təlimlər keçiriləcək:
Bu il üçün dövlət məktəbəqədər təhsil müəssisələrinin (uşaq bağçaları) tərbiyəçiləri üçün təlimlərin keçirilməsi nəzərdə tutulub
Hazırda ölkədə fəaliyyət göstərən bütün ümumtəhsil müəssisələri əyani şəkildə fəaliyyət göstərir:
Gün ərzində ölkə üzrə yoluxma sayları yetərincə azdır, bu səbəbdən ayrı-ayrı yerlərdə tək-tük xəstələnmə halı ola bilər. Mövcud şəraitdə məktəblərdə ciddi problem yaşanmır.
Uşaq bağçalarına qəbul iyul ayından başlayacaq:
Uşaq bağçalarına qəbula iyul ayından başlaması nəzərdə tutulub.
Bağçalarda işə qəbulla bağlı işçi qrup yaradılıb:
Uşaq bağçalarında tərbiyəçilərin və təhsilverənlərin işə qəbulu ilə bağlı müvafiq işçi qrup yaradılıb.
Məktəbəhazırlıq qrupları ləğv edilməyəcək:
Məktəblərdə fəaliyyət göstərən məktəbəhazırlıq qruplarının ləğv edilməsi nəzərdə tutulmayıb.
Müəllimlərin iş yerinin qarşılıqlı dəyişdirilməsi müsabiqəsinə başlanılır:
Təhsil Nazirliyi sisteminə daxil olan dövlət ümumi təhsil müəssisələrində çalışan müəllimlərin iş yerinin qarşılıqlı dəyişdirilməsi müsabiqəsi həyata keçiriləcək.
Müsabiqəyə növbəti həftə ərzində start verilməsi planlaşdırılır.
