Bakalavr təhsilini bitirənlər və ya bitirmək üzrə olanlar adətən magistratura təhsili almaq qərarına gəlirlər. Lakin tələbələr magistr təhsili ala bilmək üçün kurslara, hazırlıqlara üz tuturlar. Bu da öz növbəsində həm vaxt itkisinə, həm də əlavə maliyyə xərclərinə səbəb olur.
Bəs, görəsən, bu gün universitetlər tələbələri niyə magistraturaya hazırlaya bilmir?
Mövzu ilə bağlı AzEdu.az-a açıqlama verən Təhsildə Təhlil və Kommunikasiyalar Mərkəzinin direktoru Kamran Əsədovun sözlərinə görə, ali məktəblər bakalavr səviyyəsində tədris proqramını elə hazırlamalıdırlar ki, tələbələr əldə etdikləri bilik və bacarıqları magistratura təhsilində də istifadə edə bilsinlər:
“Universitetlərin tələbələri magistraturaya hazırlaşmaq üçün kifayət qədər hazırlıqlı etməməsi həm təhsil sisteminin strukturunda, həm də tədris metodlarında bəzi ciddi problemlərin olduğuna işarə edir. Azərbaycanda bakalavr təhsilini başa vuran tələbələrin əksəriyyəti magistratura təhsili almağı arzulayır. Lakin tələbələrin böyük bir hissəsi magistratura qəbul imtahanlarına hazırlaşmaq üçün universitetdən kənar kurslara müraciət edir. Bu vəziyyət həm vaxt itkisinə, həm də əlavə maliyyə xərclərinə səbəb olur ki, bu da təhsilin keyfiyyətinin yetərsiz olduğuna dəlalət edir.
Əvvəla, universitetlər bakalavr səviyyəsində tədris proqramını elə strukturlaşdırmalıdırlar ki, tələbələr əldə etdikləri bilik və bacarıqları magistratura təhsilində də istifadə edə bilsinlər. Bu baxımdan, bakalavr təhsilinin son illərində tələbələrin magistratura tələblərinə uyğun nəzəri və praktiki biliklərə yiyələnməsi üçün xüsusi kurslar və proqramlar daxil edilməlidir. Hazırda bu, əksər universitetlərdə həyata keçirilmir. Universitetlər tələbələrin magistraturaya keçidi üçün konkret dəstək proqramları təmin etsəydilər, tələbələr kurslara müraciət etmək məcburiyyətində qalmazdılar”.
Həmsöhbətimiz vurğulayıb ki, magistratura təhsilinə yönəlmiş seminar və görüşlər də tələbələrin bu sahədəki biliklərini artırmağa kömək edə bilər:
“Məsələn, təcrübəli akademik heyət ilə təşkil olunan seminarlar tələbələrə magistratura tələbləri və tədqiqat metodları haqqında məlumat verməklə onların hazırlaşma prosesini asanlaşdırardı. Bu, tələbələrə elmi araşdırmalar aparma, analitik düşünmə və akademik yazı bacarıqlarını inkişaf etdirmək üçün imkan yaradar, magistratura təhsilində müvəffəqiyyətə nail olmalarına zəmin hazırlayar.
Universitetlərdə təhsilin tətbiqi və praktiki yönümünün gücləndirilməsi də vacibdir. Təcrübə göstərir ki, tələbələr çox vaxt nəzəriyyə üzərində dayanır, lakin həmin bilikləri praktikada tətbiq etməkdə çətinlik çəkirlər. Bu problemlə qarşılaşmamaq üçün universitetlər bakalavr təhsilində praktik tədrisi və tətbiqi tədqiqatı ön planda tutmalıdır. Həmçinin tələbələr üçün araşdırma aparmaq, analitik təhlil etmək və məlumatları sistematik şəkildə təqdim etmək bacarıqlarını inkişaf etdirəcək dərslər və laboratoriya çalışmalarına daha çox yer vermək lazımdır”.
