Ali təhsil və orta ixtisas təhsili müəssisələrinə qəbul aparılan ixtisaslar sırasına xüsusi qabiliyyət tələb edən ixtisaslar (XQTİ) da daxildir. Ali təhsil müəssisələrinin xüsusi qabiliyyət tələb edən ixtisasları Təsviri sənət, Musiqi sənəti, Memarlıq, Teatr, kino və xoreoqrafiya sənəti, Bədən tərbiyəsi, idman və Jurnalistikadır.
Bəs abituriyentlər ali təhsil müəssisələrinə imtahan verdikdən sonra nə zaman qabiliyyət imtahanından keçməlidir?
AzEdu.az-ın DİM-dən aldığı məlumata əsasən, qəbul imtahanları başa çatandan və nəticələri elan olunandan sonra qabiliyyət imtahanı keçirilir.
Xüsusi qabiliyyət tələb edən ixtisaslara qəbul olunmaq istəyən və imtahanda topladıqları ümumi balları müvafiq müsabiqə şərtlərini ödəyən abituriyentlər imtahanların nəticəsi elan olunduqdan sonra müəyyən olunmuş müddətdə DİM-in internet səhifəsinə daxil olaraq, seçdikləri XQTİ-nin aid olduğu komissiya(lar) üzrə qeydiyyatdan keçməlidirlər. Qeydiyyatdan keçmiş abituriyentlər qabiliyyət imtahanında iştirak etməlidirlər. Müəyyən olunmuş vaxtda qeydiyyatdan keçməyən abituriyentlər qabiliyyət imtahanına buraxılmırlar.
