“İndi şagirdlər daha az dərsə gedir. Biz 10 il oxusaq da, bir çoxumuz şənbə günü də dərsə getmişik. Məktəb günlərinin azaldılması uşaqlarımıza yaxşı nəsə vəd etmir. Tədris ili nə qədər uzun olarsa, uşaqların gələcəyi daha yaxşı olar. Mən bir təhsil işçisi kimi inanıram ki, təhsil müddəti uzun olsa, daha yaxşı olar. Təhsil müddətini qısaltmaq təhsildən gözləntiləri də qısaltmalıdır".

Bu fikirləri elm və təhsil naziri Emin Əmrullayev dünən keçirilən brifinqdə səsləndirib. Nazir qeyd edib ki, məktəblərdə sentyabrın 1-dən tədrisin başlaması daha yaxşı olardı.

Təhsil müddətinin çox olması tədrisinin keyfiyyətinə nə dərəcədə təsir göstərir?

Təhsil eksperti Adil Vəliyev AzEdu.az-a bildirib ki, dərslərin sentyabrın 1-də və yaxud 15-də başlamasının təhsilin keyfiyyətinə o qədər də böyük təsiri yoxdur.

“Bizim vaxtımızda dərslər sentyabrın 1-də başlayırdı. Dərslərin sentyabrın 1-də və yaxud 15-də başlamasının təhsilin keyfiyyətinə o qədər də böyük təsiri yoxdur. Dərclərin 15 gün tez və ya 15 gün gec başlaması böyük əhəmiyyət daşımır. Əsas məsələ dərsliklər, tədris proqramları ilə bağlıdır. Keyfiyyətdə fərq görmək istəyiriksə, tədris proqramımızı dəyişməliyik.

Düşünürəm ki, biz məsələnin həllini yanlış istiqamətdə axtarırıq. Bunun üçün də doğru qərarlar verə bilmirik”.

Ekspert təhsilin keyfiyyətinin yüksəlməsi üçün çıxış yolunu dərsliklərin və tədris proqramının yenilənməsində görür.

“Dərsliklər demək olar ki, hər il yenilənir. Bizi dərsliklərin yoxlanması üçün dəvət edirlər və görürük ki, dərsliklərdə vəziyyət yaxşıdır. Ancaq bu, kifayət deyil. Tədris proqramları yenilənməlidir”.

Müsahibimizin fikrincə, məktəbdə əlavə materiallardan istifadə olunması şagirdlərin dərs yükünü artırır.

“Başqa bir məsələ də bundan ibarətdir ki, uşaqlar məktəbdə yüklənirlər. Müəllimlər şagirdlər üçün hazırlanan dərsliklərdən başqa, əlavə materiallardan da istifadə edirlər. Bunun nəticəsi olaraq da uşaqların dərs yükü çoxalır”.

Təhsil eksperti Kamran Əsədovun fikrincə, ən optimal tədris ili 1 sentyabr - 30 maydır.

“1-15 sentyabr dərs müddəti ilə 1-14 iyun dərs müddətini eyniləşdirmək, hava temperaturu eynidir demək absurd fikirdir. Birincisi ona görə ki, 1-15 sentyabrda hava temperaturu yuxarıya doğru qalxmır, əksinə sərinləşir, temperatur daha yaxşı olur ki, bu da dərsə getmək üçün əlverişlidir. Amma 1-14 iyunda hava daha da istiləşir, temperatur hər gün yuxarıya doğru qalxır və tədris üçün əlverişsiz olur.

Bundan başqa, 1-15 sentyabr təsirin başlaması üçündür. Yəni şagirdlər dərsə başlayır, enerjilidirlər, həvəslidirlər. 1-14 iyun isə tam əksinə, şagirdlər 9 ay, 32-34 həftə ərzində dərsə gəlib yorulublar, əlavə olunan vaxt isə onlara əlavə yükdür. 

Düşünürəm ki, ən optimal tədris ili 1 sentyabr - 30 maydır. Bu tədris ilinin tətbiqi daha effektiv olar”.