Cari tədris ilinin əvvəlindən Təhsil Nazirliyi proqramlaşdırmanın tədrisi məqsədi ilə informatika fənni üzrə pilot layihənin mərhələlər üzrə tətbiqinə başlayıb.
Hazırda Bakı şəhərində 45 məktəb üzrə 240 sinifdə 6500-ə yaxın V sinif şagirdi informatika fənnini yeni formatda öyrənir. Bu fənn üzrə dərsləri tədris edən 190 müəllim Təhsil İşçilərinin Peşəkar İnkişafı İnstitutunda (TİPİİ) xüsusi hazırlanmış peşəartırma təlimində iştirak ediblər.
Təhsil Sisteminin Informasiyalaşdırma İdarəsinin rəhbəri Vüsal Xanlarov AzEDU.az-a açıqlamasında pilot layihənin 45 məktəbdə 190 müəllimi əhatə etdiyini bildirib:
“Bu məktəblərdə 6000-dən çox şagird təhsil alır. Tədris prosesinin nəticəsində şagirdlərin göstəriciləri təhlil olunacaq və nəticələrə əsasən, layihənin necə davam edəcəyinə qərar veriləcək. Hazırda bu proses, 45 məktəbin 5-ci sinifləri üzrə aparılır. Layihə Bakı məktəblərində tətbiq olunur və nəticələr qiymətləndirildikdən sonra bölgələrdə tətbiqinə başlanıla bilər. Təhsil Nazirliyi olaraq bütün fənnlərin tədrisində göstəriciləri və istifadə olunan tədris metodlarını təkmilləşdirməyə çalışırıq. İnformatika fənni də həmişə diqqət mərkəzində saxlanılır. Bu fənn şagirdlərdə bacarıq və vərdişlərdən əlavə, alqoritmik düşüncə tərzini inkişaf etdirir. Alqoritmik düşüncə tərzi 21-ci əsr bacarıqlarının əsasını təşkil edir. Bu sistem sayəsində şagirdlər gələcək həyatlarını və karyeralarını qurmaq üçün düzgün düşüncə tərzi əldə edəcəklər.
Məlumdur ki, Təhsil Nazirliyi İnformatika fənninin yeni formada tədrisi üzrə pilot layihəyə başlayıb. Layihə informasiya texnologiyaları (İT) sistemləri və rəqəmsal bacarıqların öyrədilməsi üzrə proqramlar hazırlayan "Alqoritmika" beynəlxalq təhsil şirkəti ilə birgə həyata keçirilir. Bu layihə çərçivəsində məktəblərdə İnformatika fənninə marağın və bu fəndən dərs deyən müəllimlərin sayı artıb”.
Vüsal Xanlarovun sözlərinə görə, İnformatika fənninin mənimsənilməsi kompüter elmləri sahəsində kodlaşdırma, kibertəhlükəsizlik, şəbəkə inzibatçılığı və bir çox istiqamətdə ixtisaslaşmaq imkanı yaradır:
“5-ci sinifdə tədris planı kodlaşdırmanın öyrədilməsinə yönəlib. Bunu da başa düşmək üçün şagirdlərdə alqoritmik düşüncə tərzi formalaşdırılmalıdır. Dərslər elə qurulub ki, dərslərdə istifadə olunan hər metod şagirddə düşüncə tərzinin inkişafına xidmət edir. Bu yalnız fənn bacarıqlarını deyil, eyni zamanda məktəblinin daha düzgün qərar vermə qabliyyətini də artırmış olur”.
Nəzrin Rüstəmova
