Bir çox tələbəni maraqlandıran mövzulardan biri ikili diplom məsələsidir. Ölkəmizdə hansı universitetlərdə ikili diplom programı mövcuddur?

Layihəmizin növbəti araşdırma yazısı Azərbaycan Universitetinin ikili diplom proqramları haqqındadır.

Azərbaycan Universitetinin (AU) İctimaiyyətlə əlaqələr və informasiya şöbəsinə müdiri Lalə Dilanova AzEdu.az-a bu barədə məlumat verib.

Bildirib ki, Azərbaycan Universitetinin beynəlxalq ikili diplom proqramlarının sayı 2-yə çatıb.

Hazırda Ukraynanın Xarkov Milli Radioelektronika Universiteti (XNURE) ilə imzalanan müqaviləyə əsasən, kompüter mühəndisliyi ixtisası üzrə bakalavriat və magistratura səviyyələrində beynəlxalq ikili diplom proqramı tətbiq olunur.

Bundan əlavə, Azərbaycan Universiteti Tuscia Universiteti ilə də ikili diplom proqramı həyata keçirəcək.

Belə ki, Azərbaycan Universiteti ilə İtaliyanın Tuscia Universiteti arasında beynəlxalq ikili diplom proqramının tətbiqinə dair əməkdaşlıq müqaviləsi imzalanıb.

Tərəflər müqavilə əsasında magistratura pilləsində “Biznesin təşkili və idarə edilməsi” (MBA, marketinq) ixtisaslaşması üzrə kadr hazırlığı həyata keçirəcək.

İkili diplom proqramının icrasına cari ilin sentyabr ayında başlanacaq. Təhsil müddəti 2 təqvim ilidir. Yerli və xarici tələbələrə açıq olan magistratura proqramında dərslər hər iki ali təhsil müəssisəsinin professorları tərəfindən tədris ediləcək. Fənlərin tədrisi ingilis və italyan dillərində aparılacaq. Proqrama müraciətləri qəbul olunan magistratura tələbələri birinci tədris ilində Azərbaycan Universitetində, ikinci tədris ilində isə İtaliyanın Tuscia Universitetində oxumaqla hər iki ali məktəbin magistr diplomunu əldə edəcəklər.