Ayan Əhmədova: “Məğlubiyyəti qəbul etməyən ermənilər məni davamlı təhdid edirdilər”
“Mən erməni iştirakçının tələbini rədd etdim, çünki o şəhidlərimizin ruhunu təhqir etmişdi. Ancaq o təhdidlərə davam edirdi”.
Bunu AzEdu.az - a açıqlamasında Qarabağla bağlı təşkil edilən müsabiqədə qalibiyyət qazanan Azərbaycan təmsilçisi Ayan Əhmədova deyib.
Əvvəlcə onu tanıyaq... Ayan Əhmədova Sumqayıt şəhərində yaşayır. 15 yaşı var və 9 kitab müəllifidir. Sumqayıt şəhər 11 nömrəli tam orta məktəbinin 9-cu sinfində təhsil alır.
Ayan, “Qarabağ Azərbaycandır” məqaləsi ilə qatıldığı müsabiqədən bəhs edib:
“2020 -ci ilin dekabr ayında İngiltərə, Amerika, Rusiya, Türkiyə, Rusiya, Azərbaycan və Ermənistan kimi ölkələrin iştirakı ilə Qarabağla bağlı müsabiqə keçirildi. Müsabiqədə 15-17 yaşlı yeniyetmələr iştirak edirdi. Müsabiqə 6 turdan ibarət idi və biz bütün turları uğurla keçərək Ermənistanla finala qaldıq. Ermənistan bir məqalə ilə, mən də “Qarabağ Azərbaycandır” adlı məqalə ilə müsabiqəyə qatılmışdım. Finalda 1057 balla biz qalib, 957 balla isə Ermənistan ikinci oldu”.
O, erməni iştirakçının müsabiqənin yenidən keçirilməsini tələb etdiyini və onu təhdid etdiyini qeyd edib:
“Erməni iştirakçı Fransada yaşayan Aron Skobyan adlı etnik erməni nümayəndəsi idi. Finaldan sonra erməni iştirakçı sosial şəbəkə vasitəsi ilə mənə yazdı. O, yarışın yenidən təşkil edilməsini və mənim başqa mövzuda məqalə ilə qatılmağımı tələb etdi, mən də rədd etdim. Çünki mənim məqaləm Qarabağ, şəhidlərimizin ruhu ilə bağlı idi və o şəhidlərimizin ruhunu incitmişdi. Danışarkən mən ona Ermənistanın müharibə zamanı Bərdə və Gəncədə mülki əhaliyə qarşı hücumlarına diqqət çəkdim və bunun qətliam olduğunu bildirdim. O, isə məni hər dəfə ədalətsiz adlandırır və müsabiqənin yenidən təşkilini tələb edirdi. Elə bütün məsələ də bundan sonra başladı. Məğlubiyyəti heç cür qəbul etməyən erməni iştirakçı sosial şəbəkələr vasitəsi ilə dostları ilə birlikdə davamlı olaraq məni təhdid edirdi. Əvvəlcə bunlardan təbii olaraq narahat olduq, ancaq artıq əhəmiyyət vermədik”.
Ayan son olaraq Qarabağ həqiqətlərinin tanınması üçün bundan sonra da əlimdən gələni edəcəyini və heç vaxt geri çəkilməyəcəyini bildirib.
kitabı