Azərbaycan Dövlət iqtisad Universitetinin (UNEC) baş müəllimi Sevda Məmmədova Ümumdünya Səhiyyə Təşkilatının (ÜST) sertifikatına layiq görülüb.

AzEdu.az –ın məlumatına görə, S.Məmmədova bildirib ki, COVID-19-la əlaqədar olaraq səhiyyə sistemində islahatlar, xüsusi ilə də səhiyyənin maliyyələşməsi məsələləri dövlət, özəl, qeyri-hökumət təşkilatları, elm mərkəzləri və ali təhsil müəssisələri tərəfindən ciddi tədqiq olunur. Bu məqsədlə Ümumdünya Səhiyyə Təşkilatı (ÜST) səhiyyənin maliyyələşməsi kursu üzrə sertifikatlı təlim proqramı keçirib. Proqram 6 moduldan ibarət olub: səhiyyə sferasının maliyyələşməsi haqqında ümumi anlayış, maliyyə vəsaitlərinin toplanması, akkumulyasiya, tibbi xidmətlərin satın alınması, dövlət təminat paketinin dizaynı, qısa icmal. Bu sertifikasiya proqramında S.Məmmədova iştirak edib, bütün modullardan yüksək qiymət alaraq ÜST-nin direktoratı tərəfindən sertifikata layiq görülüb.

Qeyd edək ki, iqtisad üzrə fəlsəfə doktoru S.Məmmədova Azərbaycanda ilk dəfə səhiyyənin maliyyələşməsi mövzusunda dissertasiya işinin müdafiəsinə görə alim adını qazanıb. Səhiyyənin maliyyələşməsi sahəsində 50-dən çox elmi əsəri, o cümlədən “Finansı”, “Finansı i kredit”, “Ekonomika i upravleniye”, “Belarus Dövlət İqtisad Universitetinin elmi əsərləri” və digər jurnallarda dərc olunub.(Azərtac)