“Mən uğur hekayəsi anlayışını qəbul etmirəm. Düşünürəm ki, uğur qazanılası bir  şey deyil. Uğur özünə olan münasibəti dəyişməkdir. Əgər insan olduğu mövqedən razı deyilsə  və onu yaxşılaşdırmaq üçün çalışırsa,  çalışma prosesi, bu zaman rastlanan maneələr, pozitiv və neqativ nəticələr uğur prosesidir”.

Müsahibimiz “Orkhanway Coaching” şirkətinin rəhbəri, Beynəlxalq Əmək Təşkilatının biznes təlimçisi Orxan Şahbazdır.

Yəqin ki, oxucularımızın çoxu müsahibimizi artıq tanıyır. Gəlin, onun keçdiyi yolu, qarşılaşdığı çətinlikləri  bir də öz təqdimatında oxuyaq. Bizim bu gün tanıdığımız Orxan Şahbazı müsahibimiz nəyə borcludur?

-Keçmişdə olan sıxıntılı hallara baxmayaraq, mübarizə aparmağıma, daim araşdırmağa meyilli olmağıma borcluyam.

Təhsil aldığım müddətdə bir çox çətinliklərlə rastlaşmışam. Bu kimi sıxıntılar, problemlər məni daha əzmkar olmağa, daim mübarizəyə sövq edib.

Orta məktəbi bitirdikdən sonra Odlar Yurdu Universitenin Biznesin İdarəedilməsi ixtisasına qəbul oldum. Təəssüflər olsun ki, bizdə digər ölkələrdən fərqli olaraq özəl universitetlərə birmənalı yanaşma yoxdur. Atamla – anam deyirdi ki, başqa universitet qalmamışdı ki, getdin, özəl universitetə qəbul oldun.

Düzdür, balım 400 – dən çox olduğuna görə illik ödənişimdə bir qədər endirimlər oldu. Amma yenə də ailəmin bu pulu ödəməyə imkanı çatmırdı. Məcbur qalıb işləməyə başladım. İlk dəfə marketlərin birində satıcı işləməyə başladım.

Daha sonra bir müddət fəhlə, ofisiant kimi işlərdə də çalışdım. Həmin dövrdə idmanla da məşğul olurdum və tədrisim ingilis dilində olduğu üçün dərslərimi də yaxşı oxumağa məcbur idim. Bütün bu maneələrə baxmayaraq, 4 il ərzində cəmi bircə dəfə kəsilmişəm və universiteti yaxşı qiymətlərlə bitirmişəm. Təhsil haqqımı ödəmək üçün həm çalışaraq, həm də oxuyaraq Amerikanın Linkoln Universitetinin ikili proqramı vasitəsilə Biznesin idarə edilməsi və marketinqi ixtisasını bitirmişəm. Hazırda Qlazqo Universitetində Sosial Psixologiya üzrə distant təhsil alıram”.

“Artıq heç kimdən asılı olmadan öz iş rejimimi özüm planlaşdırıram”

-Özünüz də qeyd etdiniz kimi bir neçə uğursuz iş müraciətləriniz olub. Bəs öz şirkətinizi sıfırdan necə qurdunuz?

-Əslində, 3-cü kursdan sonra başa düşdüm ki, mən sağda-solda işləməklə heç nə əldə edə bilməyəcəm. Bu vaxta qədər ictimai birliklərdə, sosial fəaliyyətlərlə məşğul olurdum. Dərk etdim ki, peşəkar istiqamətdə addım atmalıyam. İlk peşəkar işim intellekt şirkətində marketinq meneceri olub. Akademik şəkildə fəaliyyət göstərirdim. Bir müddət müxtəlif şirkətlərdə satış və marketinq meneceri olaraq fəaliyyətimə davam etdim. Daha sonra hərbi xidmətə getdim.

Hərbidən qayıtdığım zaman bir şirkətdə mühafizəçi işləyirdim, bu müddətdə həmin şirkətə və başqa bir şirkətə CV göndərdim. Şirkətlərdən biri məni işə qəbul etdi. Biznesin inkişafı üzrə kiçik mütəxəssis rolunda fəalliyyət göstərdim. Bu işdə çalışdığım müddətdə əvvəlcədən mövcud olan “Orkhanway” ideyasını gücləndirdim. Bir sıra təlimlər keçməyə başladım və  beləliklə,  rəsmi olaraq “Orkhanway” adlı şirkətimi qurdum. Mən artıq müəyyən qədər də olsa çəkdiyim əziyyətlərin bəhrəsini görürdüm. Artıq heç kimdən asılı olmadan öz iş rejimimi özüm planlaşdırırdım”.

-İndiyə qədər bir neçə universitetdə təlimlər təşkil etmisiniz. Sizin üçün ən maraqlı audutoriya hansı universitetdə idi. Bunun səbəbini necə açıqlayardınız?

-Ən maraqlı çıxışım  Azərbaycan Dövlət Pedaqoji Universitetində (ADPU) universitetində olub. Audutoriya da 3000 tələbə var idi.  Maraqla mənim çıxışımı izləyir, ardı-arxası kəsilməyən suallar ünvanlayırdılar. Mən həmin suallara böyük məmnuniyyətlə cavab verirdim.

-Audutoriya qarşısında çıxış etdiyiniz ilk günü necə xatırlayırsınız? Təsvir edə bilərsiniz?

-İlk ümumi, kütləvi çıxışım Odlar Yurdu Universitetində 3-cü kurs tələbələri qarşısında olub. Həmin təlimdən sonra maraqlı və bir qədər gülməli hadisə baş verdi. Tələbələrdən biri mənə yaxınlaşıb dedi:

Çox sağolun, sayənizdə bir günlük müəllimlərin dərslərindən azad olduq. (gülür)

-İnkişaf etmək istəyən, bu yolda təzə-təzə addımlar atan bir gəncə necə istiqamət verərdiniz?

-İnkişaf zamanla həm mənfi, həm müsbət -hər iki formada davam edir. İndiki bizlə 5 il sonrakı biz eyni olmayacaq. İnkişafdan əlavə burada əsas məsələ artım məsələsidir. İnsanların keçən müddətdə gördükləri işdə, şəxsi həyatında və kariyeralarında artım olmalıdır. Gənclərə məsləhət yox, təklifim budur ki, reallığı görməyə çalışsınlar, araşdırma aparsınlar və sonda gördükləri reallıqla apardığı araşdırmaya fokuslanaraq kariyeralarına tətbiq etsinlər”.