https://www.zirve.edu.az/
27.04.2018 14:57
Bu xəstəlik hər 4 dəqiqədən bir mütləq kimisə öldürür – Dünyanın yeni bəlası

Bu gün Azərbaycan Tibb Universitetinin (ATU) Tədris Terapevtik Klinikasında Heydər Əliyevin anadan olmasının 95 illiyinə həsr olunan II Alman- Azərbaycan Serebrovaskulyar Simpoziumu keçirilib.

AzEdu.az xəbər verir ki, simpozium iştirakçıları tədbirdən öncə Fəxri Xiyabanda ümummilli lider Heydər Əliyev və akademik Zərifə xanım Əliyevanın məzarını ziyarət ediblər, məzarların önünə gül dəstələri düzüblər. Daha sonra simpozium işinə başlayıb. 

Tədbirdə açılış nitqi ilə çıxış edən ATU Tədris Terapevtik Klinikasının direktorunun elm və tədris işləri üzrə müavini Adil Nuriyev iştirakçıları universitet rəhbərliyi adından salamlayıb,simpoziumun işinə uğurlar arzulayıb. A.Nuriyev beynəlxalq simpoziumda müasir tibb üçün böyük əhəmiyyət kəsb edən aktual mövzuların müzakirə olunacağını diqqətə çatdırıb.

Tədbirin moderatoru, professor Ahmet Memiş bildirib ki, simpoziumda müzakirə edilən insult xəstəliyi ölüm səbəbinə görə dünya üzrə 3-cü yeri tutur:

“Baş və onurğa beynin bir bölgəsini qidalandıran damarların patologiyasının yaratdığı keçici və qalıcı, yəni işemik və hemorragik tipli patologiyalara səbəb olan xəstəliklər qrupu insultlar adlanır. Amerikada aparılan tədqiqatlar göstərir ki, hər 40 saniyədən bir Birləşmiş Ştatlar vətəndaşı insult keçirir və hər 4 dəqiqədən bir ölkədə insult nəticəsində vəfat edən xəstə olur. Hər il ölkədə 800 min nəfərə yaxın insultdan əziyyət çəkən olur. Böyük Britaniyada isə hər il 100 min nəfər insultla xəstələnir və onlardan 400 mini 10 yaşına qədər olan uşaqlardır”.

Professor A.Memiş deyib ki, insult  tibbi problem olmaqla yanaşı, həm də çox böyük iqtisadi problemdir. Ötən ildə ABŞ-da bu xəstəlik üçün 60 milyard dollar  xərclənib. Odur ki, insultun qarşısını almaq, vacib profilaktiki tədbirlər görmək hər bir ölkənin səhiyyəsinin qarşısında dayanan əsas məsələlərdən biridir.

Simpoziumun diaqnostika bölməsində tibb üzə fəlsəfə doktoru Nuran Əmənullayev “Mərkəzi sinir sisteminin damar xəstəlikləri: statistika, təsnifat, klinika”, həkim Kamran Yaqubov  “Beyin qan dövranı pozulmalarında diaqnostik KT və MRT, angioqrafiya”, Nuran Abdullayev  “Neyroradioloji diaqnostikada ən son elmi yeniliklər” mövzusunda məruzə ediblər. Daha sonra beyin damarlarının anevrizmasında indiyə qədər ölkəmizdə icra olunmayan müalicə metodları barədə də məruzə və çıxışlar dinlənilib.

Sabah simpozium insultların kliniki hallarının müzakirəsi ilə işini davam etdirəcək.