“Tarif Şurasının 2017-ci il 23 may tarixli 5 nömrəli qərarı ilə dövlət qulluğuna qəbul məqsədi ilə keçirilən test imtahanlarında iştirakla bağlı tariflər təsdiq edilərkən qiymətlərdə əlavə dəyər vergisi nəzərə alınmayıb. Həmin müddətdən bu vaxtadək Dövlət İmtahan Mərkəzi (DİM) Mərkəzin göstərdiyi xidmətlərin ƏDV-dən azad olunması ilə bağlı aidiyyəti qurumlarla yazışmalar aparıb, son nəticədə müvafiq qanunvericiliyə əsasən, təhsil xidmətlərinin ƏDV-dən azad olunması, dövlət qulluğu ilə bağlı imtahan qiymətlərinə isə ƏDV-nin tətbiq edilməsi nəzərdə tutulub”.

Bu barədə AzEdu.az - a DİM-dən bildirilib.

Qeyd edilib ki, cari ilin mart ayından DİM ƏDV ödəyicisi kimi qeydiyyatdan keçib: “Ona görə də 2019-cu il aprelin 1-dən dövlət qulluğu üzrə imtahanların tarif qiymətlərinə ƏDV tətbiq ediləcək. Təsdiq edilmiş tariflərə ƏDV əlavə olunarkən bəzi qiymətlər manat və qəpik hissələrindən ibarət olur. Hazırda ödəmə prosedurlarını həyata keçirən mövcud proqram təminatlarının və müvafiq məlumat bazalarının texniki məhdudiyyətlərini (ödənişin qəpiklə aparılmasının qeyri-mümkün olmasını) nəzərə alaraq qərara alınıb ki, müvəqqəti olaraq, DİM-in proqram təminatı və məlumat bazalarında müvafiq təkmilləşdirmə işləri başa çatanadək qəpik hissə ilə bağlı ödənişlər tam ədədə qədər azaldılıb. Aprelin 1-dən dövlət qulluğu üzrə imtahanların qiyməti vəzifə qrupları üzrə aşağıdakı kimi təsdiq edilib:

AA - 129 AZN

AB - 118 AZN

AC - 106 AZN

BA -  94 AZN

BB -  82 AZN”

Qeyd edək ki, Tarif (Qiymət) Şurasının qərarına əsasən, indiyə qədər qiymətlər aşağıdakı kimi olub:

AA - 110 AZN

AB - 100 AZN

AC - 90 AZN

BA - 80 AZN

BB - 70 AZN