Azedu.az
https://modern.az/ https://www.instagram.com/apak.az/
2018-11-30 17:50:34
“Bakı Ali Neft Məktəbi beynəlxalq məkana çıxa biləcək simvollarımızdan biridir” - Zahid Oruc

Dünən - noyabrın 29-da  Bakı Ali Neft Məktəbinin (BANM) yaranmasının 7 yaşı tamam olub. Yarandığı gündən Azərbaycan universitetlərinin reytinq cədvəlində öz liderliyini saxlayan Bakı Ali Məktəb Azərbaycan Prezidenti İlham Əliyevin 29 noyabr 2011-ci il tarixli 539 nömrəli  Fərmanı ilə SOCAR-ın strukturunda yaradılıb. 

Maraqlıdır, deputatlarımız 7 yaşını qeyd edən Bakı Ali Neft Məktəbi (BANM) haqqında nə düşünür? BANM bi illər ərzində hansı uğurlar əldə edə bilib? 

AzEdu.az bu suallarla Millli Məclisin deputatı Zahid Oruca  müraciət edib. 

Deputat bildirib ki, Azərbaycan təhsil məkanına cəmi 7 il əvvəl daxil olan Bakı Ali Neft Məktəbi 21-ci əsrin sürətli inkişaf və rəqabət mühitinin tələbləri çərçivəsində xalqımızın sayseçmə balalarını gələcəyin kadrları kimi hazırlayan qürurverici elm ocaqlamızdan birinə çevrilib:

“Göründüyü kimi, qısa bir zamanda millətimizin rəğbətini və seçimini qazanmaq yalnız informasiya məkanındakı təbliğat, tələbə sayının rasionallığı və yetərli maliyyə imkanları hesabına mümkün ola bilməzdi. Şübhə yoxdur ki, ölkə başçısının qarşıya qoyduğu tələblər və standartlar burada yetərincə yüksək olub, həmçinin qabaqcıl dünya təcrübəsinin öyrənilməsi və peşəkarlıqla tətbiq edilməsi əldə olunan uğurların bir nömrəli təminatına çevrilib. Prezidentin tapşırığı ilə Qərbin təhsil aləmində liderliyi ilə seçilən və hər il 10 minlərlə tələbəni öz qoynuna alan Böyük Britaniyanın proqramları əsasında formalaşan, eləcə də Avropada mühəndis hazırlığına dair laborator və digər təcrübi avadanlıqlarla təchiz olunan bir müəssisədə professor-müəllim heyəti ilə işi sağlam prinsiplər, ədalətli idarəetmə qaydaları ilə əhatə etdiyinizdə şübhəsiz ki, böyük uğurlara imza atmaq mümkün olur. Məktəbin ötən il inşa olunan və Cənubi Qafqaz regionunda ön yeri tutan kampusu şəxsən İlham Əliyevin özünün iştirakı ilə açılması da uzun illər hər birimizin arzuladığı komplektləşmiş təhsil ocağı nümunəsi kimi BANM-ni qürur ünvanına çevirir. Şübhə yoxdur ki, Qərbin az qala 1000 illik universitet qurma tarixi və təcrübəsi fonunda Bakı Ali Neft Məktəbinin planları, ambisiyaları və strategiyaları bir çoxlarına əlçatmaz görünə bilərdi. Lakin cəmi bir dəfə Məktəbi ziyarət etmək kifayətdir ki, oradakı sağlam mühiti, doğma münasibətlər sistemini, bürokratizmdən uzaq tələbə-müəllim tandemini görəsən və əmin olasan ki, bura yaxşı bir elm məbədidir”.

Deputat deyib ki, təhsil sahəsində böyük təcrübəsi və yetkilliyi ilə fərqlənən rektor Elmar Qasımovun bütün varlığı ilə rəhbərliyi etdiyi elmi müəssisəyə bağlı olması, sadə və əlçatan xarakteri, sağlam prinsipləri əldə əsas götürməsi, xarizmatik keyfiyyətləri artıq ilk məzunlarına həyat vəsiqəsi verən bir qurumun nailiyyətlərinin özülündə dayanan mühüm amillərdir: 

“Rektor obrazı şübhəsiz administrativ və ideoloji yükü birgə daşıyanda, həmçinin milli mənafeləri və qabaqcıl elmi tendensiyaları özündə ehtiva edəndə nəinki keçmiş rəhbər kultları sınıb-dağılır, eləcə də indiki şəraitdə böyük təhsil islahatları şəraitində ən yaxşı nümunələrdən birinə çevrilir. Elmar Qasımovu dünən başçılıq etdiyi təhsil ocağının əzəmətli salonunda 500 dən artıq müəllim-tələbə-valideyn heyəti qarşısında ötkəm və güvənilən çıxış etməsinin də səbəblərini burada axtarmaq lazımdır.Gerçəkdən də hər il 30-dan artıq prezident təqaüdçüsü əgər gələcək taleyini buraya bağlayırsa, Məktəbə qəbul balı 650-dən yuxarı qalmaqda davam edirsə, onda istər Azərbaycanda fəlaiyyət göstərən BP, Emerson, Hallubarton və digər onlarla nüfuzlu şirkətlər, eləcə də qardaş Türkiyədə Əliyevlə Ərdoğanın birgə iradəsi ilə qurulan Star zavodunda Bakı Ali Neft Məktəbinin yetirmələrinin xüsusi bir çəkiyə sahib olması tamamilə təbiidir. Belə bir mühitdə çoxları üçün yalnız mühəndis, texniki təfəkkür sahibləri kimi görünən adamların qəlblərində təkcə mərəkkəb texnoloji qurğulara deyil, eləcə də təmsil etdikləri millətin tarixinə, mədəniyyətinə, ədəbiyyatına və incəsətinə bağlılığı görmək həqiqətən çox təsirli səhnələr idi. Bədii qiraət üzərində 7 yaşını qeyd edən bir təhsil ocağının xoş mühitində dünən Yaponiyanın nüfuzlu Fuji Tv-nin Azərbaycana 2 saatlıq film üçün gələn əməkdaşları da, eləcə də çoxsaylı qonaqlar da öz doğma evlərinin qaynarlığını yaşayırdılar”. 

Z. Oruc şübhə etmir ki, 160 ildən artıqdır ki, yalnız neftlə məşhurlaşan Bakını gələcəkdə nüfuzlu təhsil ocaqları ilə də tanıyacaq:

“Bakı Ali Neft Məktəbi beynəlxalq məkana çıxa biləcək simvollarımızdan biridir və ocağın istisini qorumaq,yaymaq və gücləndirmək lazımdır. Axı millət yalnız universitetləri ilə güclü olur!”.