2018-2019-cu tədris ili üçün SOCAR AQŞ-nin Tələbə Təqaüdü Müsabiqəsinin seçim mərhələsi yekunlaşıb.

SOCAR AQŞ-dən bildirilib ki, müəssisənin yaxından əməkdaşlıq etdiyi Azərbaycan Dövlət Neft və Sənaye Universitetinin və Bakı Ali Neft Məktəbinin (BANM) neft-qaz mühəndisliyi ixtisası üzrə təhsil alan sonuncu kurs tələbələri müsabiqədə fəal iştirak edib. Müəssisənin rəhbərliyinin təmsil olunduğu münsiflər heyəti ilkin mərhələni uğurla keçmiş 15 namizəd arasından qalibləri seçib.

Müsabiqənin qalibləri Azərbaycan Dövlət Neft və Sənaye Universitetinin qaz-neft mədən fakültəsinin IV kurs tələbələri Səbinə Bəşirova və Nərminəxanım Bədirxanova, eləcə də BANM-in neft-qaz mühəndisliyi fakültəsinin V kurs tələbələri Gülşən Cabbarzadə və Zərinə Əkbərova olub.

Qaliblərlə görüşdə SOCAR AQŞ–nin baş direktoru Ramin İsayev tələbələri əldə etdikləri nailiyyət münasibətilə təbrik edərək deyib: “Müəssisənin 2018-2019-cu tədris ili üzrə elan etdiyi Tələbə Təqaüdü Müsabiqəsində iştirak edən tələbələrin seçim prosesi əvvəlki illərlə müqayisədə xeyli çətin olub. Budəfəki iştirakçılar çox yüksək bilik göstəriciləri nümayiş etdiriblər. Qaliblər aldıqları aylıq təqaüddən başqa, həmçinin gələcəkdə SOCAR AQŞ-də karyera qurmaq imkanlarından yararlana biləcəklər”.

Azərbaycan Dövlət Neft və Sənaye Universitetinin prorektoru Qasım Məmmədov builki Tələbə Təqaüdü Müsabiqəsində universitetin 2 tələbəsinin qalib elan edilməsinin qürurverici olduğunu bildirib: “SOCAR AQŞ ilə əməkdaşlıqdan məmnunluğumuzu ifadə edərək tələbə və məzunlarımızın vaxtaşırı olaraq müəssisənin elan etdiyi layihə və müsabiqələrdə iştirakını alqışlayırıq. Davamlı inkişaf tempinə məxsus müəssisədə istehsalat təcrübəsi keçmək, müsabiqənin qalibi olmaq və karyera qurmaq hər bir tələbənin arzusudur”.

Qeyd edək ki, SOCAR AQŞ milli qazma müəssisəsi olaraq neft kapitalının insan kapitalına çevrilməsi istiqamətində mövcud imkanların artırılmasına yönəlmiş təşəbbüs və proqramları dəstəkləyir. SOCAR AQŞ-nin səhmdarları SOCAR və “Nobel Oil Services” şirkətləridir.(AZƏRTAC)