2018-2019-cu tədris ili üçün ümumi təhsil müəssisələrinə müəllimlərin işə qəbulu üzrə müsabiqə uğurla başa çatıb.

Təhsil Nazirliyindən AzEdu.az-a bildiriblər ki, müsabiqənin iyulun 16-dan 31-dək 39 min 163 namizədin iştirakı ilə keçirilmiş test mərhələsində və avqustun 13-dən 18-dək dörd minədək namizədin iştirakı ilə aparılmış müsahibə mərhələsində 130-dək tələbə-könüllü iştirak edib. Tələbə-könüllülər müsabiqənin keçirildiyi tarixlərdə namizədlərin məlumatlandırılması, yönləndirilməsi, eyni zamanda, imtahan prosesində nəzarətçi qismində fəaliyyət göstəriblər.

Nazirliyin “Bir” Tələbə-Könüllü Proqramı ölkəmizin inkişafında böyük rol oynayan tələbə-könüllülərlə işi sistemləşdirmək, müvafiq fəaliyyəti stimullaşdırmaq üçün yaradılan uzunmüddətli proqramdır. Proqram tələbələrin karyera imkanları qazanmalarında, dərsdənkənar asudə vaxtlarının dəyərləndirilməsində, vətəndaş məsuliyyətinin formalaşmasında mühüm rol oynayır.